Ўзбекистонда 2017 йилдан бери жами 83 млрд долларлик инвестициялар ўзлаштирилган

Ўзбекистонда 2017 йилдан то ҳозирги кунгача 83 миллиард долларлик инвестициялар ўзлаштирилган. Бу ҳақда Президент Шавкат Мирзиёев инвестиция ва экспорт соҳаларида олиб борилаётган ва амалга оширилиши лозим бўлган ишлар бўйича видеоселекторда маълум қилди.

Қайд этилишича, бу олдинги даврга нисбатан деярли 2 баравар кўпроқ кўрсаткич.

Давлат раҳбарининг таъкидлашича, ўзлаштирилган маблағлардан 26,8 миллиард долларини хориждан жалб қилинган маблағлар ташкил этади.

Бунда тўғридан-тўғри инвестициялар — 10,6 миллиард доллар, давлат кафолати остидаги лойиҳалар учун — 8,4 миллиард доллар, кафолатсиз кредитлар — 6,6 миллиард доллар, банк ва корхоналарнинг халқаро облигациялари — 1,2 миллиард долларлик маблағ жалб қилинган.

Ўзлаштирилган инвестицияларнинг қарийб 65 фоизи саноат ва инфратузилма лойиҳаларига тўғри келади.

«Ҳар бир доллар давлатимизга фойда келтириши керак. Инвестиция инвестиция учун эмас, иш ўрни яратилиши, рақобатбардош маҳсулот ишлаб чиқариш учун ўзлаштирилиши керак. Лойиҳаларнинг самарали ишлаши учун эса корхонанинг айланма маблағи, гази, электр энергияси, экспорти нима бўляпти, булар билан доим шуғулланиш лозим», – деди Президент.

Айни пайтда республика бўйича 19 мингта бўш турган ва паст қувватларда ишлаётган объектлар мавжуд.

Шавкат Мирзиёев бир ой муддатда бўш турган ва паст самарали объектларни тўлиқ хатловдан ўтказиб, электрон платформасини яратиш бўйича раҳбарлар ва ҳокимларга топшириқ берди.

Давлат раҳбарининг кўрсатмасига кўра, вилоят, туман ва шаҳар ҳокимларининг инвестициялар бўйича ўринбосарларига ҳар бир ишламаётган бундай объектлар номма-ном бириктирилади ва йил якунига қадар камида 150 минг янги иш ўрни яратишга масъул ва жавобгар бўлади.