Эрон 12 июнь куни Ер орбитасига сунъий йўлдош ортилган элтувчи ракетани учиришга уринишда муваффақиятсизликка учраган. Бу ҳақда АҚШнинг мудофаа соҳасидаги бир қатор манбаларига таяниб CNN хабар берди.
Телеканал маълумотларига кўра, ушбу тадбир Пентагонда кузатиб турилган. Бироқ манбаларга кўра, нима учун учириш муваффақиятсиз бўлгани ва парвознинг қайси босқичида муаммолар бошлангани номаълум.
«АҚШ космик қўмондонлиги Эрон ракетасининг 12 июнь кунги муваффақиятсиз парвозидан хабардор», — деди Пентагон вакили подполковник Урия Орланд воқеа тафсилотларини ошкор қилмасдан.
Айни пайтда Associated Press Planet Labs Inc. ва Maxar Technologies компанияларининг сунъий йўлдош орқали олинган маълумотлари ҳақида хабар берди. Унга кўра, 6 июнь куни Имом Ҳомейний номидаги космодромда фаоллик ошган. 17 июнь куни, аксинча, фаолликнинг пасайиши кузатилган, аммо 20 июнь куни суратга олинган кадрлардан ушбу муассасада ишнинг тикланганини сезиш мумкин.
Масалан, фотосуратларда Эроннинг «Симург» («Сафир-1») элтувчи ракетасини аввалроқ старт майдончасидаги крангача олиб боришда фойдаланилган кўчма платформа ҳамда ёнилғи контейнерлари акс этган.
Шундан келиб чиқиб, бир қатор мутахассислар Эрон ракетани қайта учиришга уриниб кўради, деб ҳисобламоқда.
Шу билан бирга, Монтерейдаги Миддлбери халқаро тадқиқотлар институти мутахассиси Жеффри Льюис «Симург» жуда катта ракета эканини ва ядровий заряд ташувчиси бўлиш учун уни ёнилғи билан тўлдириш жуда узоқ вақт талаб қилинишини таъкидлади.
AP хабарига кўра, аввалроқ Эрон космик дастури бир қатор муваффақиятсизликларга дуч келган. Хусусан, 2019 йил август ойида Эрон ракетаси учириш майдонида портлаган.
Эрон Ислом инқилоби посбонлари корпуси (IRGC) ўзининг космик дастури устида ишламоқда, дея таъкидлади агентлик. 2020 йил апрель ойида IRGC Эроннинг биринчи ҳарбий сунъий йўлдоши муваффақиятли учирилганини эълон қилган. Кейинчалик Пентагон Эроннинг ҳарбий сунъий йўлдошни учириши АҚШнинг минтақадаги иттифоқчиларига таҳдид солиши мумкинлигини айтган.
Изоҳ (0)