Eron 12-iyun kuni Yer orbitasiga sun’iy yo‘ldosh ortilgan eltuvchi raketani uchirishga urinishda muvaffaqiyatsizlikka uchragan. Bu haqda AQShning mudofaa sohasidagi bir qator manbalariga tayanib CNN xabar berdi.
Telekanal ma’lumotlariga ko‘ra, ushbu tadbir Pentagonda kuzatib turilgan. Biroq manbalarga ko‘ra, nima uchun uchirish muvaffaqiyatsiz bo‘lgani va parvozning qaysi bosqichida muammolar boshlangani noma’lum.
“AQSh kosmik qo‘mondonligi Eron raketasining 12-iyun kungi muvaffaqiyatsiz parvozidan xabardor”, — dedi Pentagon vakili podpolkovnik Uriya Orland voqea tafsilotlarini oshkor qilmasdan.
Ayni paytda Associated Press Planet Labs Inc. va Maxar Technologies kompaniyalarining sun’iy yo‘ldosh orqali olingan ma’lumotlari haqida xabar berdi. Unga ko‘ra, 6-iyun kuni Imom Homeyniy nomidagi kosmodromda faollik oshgan. 17-iyun kuni, aksincha, faollikning pasayishi kuzatilgan, ammo 20-iyun kuni suratga olingan kadrlardan ushbu muassasada ishning tiklanganini sezish mumkin.
Masalan, fotosuratlarda Eronning “Simurg” (“Safir-1”) eltuvchi raketasini avvalroq start maydonchasidagi krangacha olib borishda foydalanilgan ko‘chma platforma hamda yonilg‘i konteynerlari aks etgan.
Shundan kelib chiqib, bir qator mutaxassislar Eron raketani qayta uchirishga urinib ko‘radi, deb hisoblamoqda.
Shu bilan birga, Montereydagi Middlberi xalqaro tadqiqotlar instituti mutaxassisi Jeffri Lyuis “Simurg” juda katta raketa ekanini va yadroviy zaryad tashuvchisi bo‘lish uchun uni yonilg‘i bilan to‘ldirish juda uzoq vaqt talab qilinishini ta’kidladi.
AP xabariga ko‘ra, avvalroq Eron kosmik dasturi bir qator muvaffaqiyatsizliklarga duch kelgan. Xususan, 2019-yil avgust oyida Eron raketasi uchirish maydonida portlagan.
Eron Islom inqilobi posbonlari korpusi (IRGC) o‘zining kosmik dasturi ustida ishlamoqda, deya ta’kidladi agentlik. 2020-yil aprel oyida IRGC Eronning birinchi harbiy sun’iy yo‘ldoshi muvaffaqiyatli uchirilganini e’lon qilgan. Keyinchalik Pentagon Eronning harbiy sun’iy yo‘ldoshni uchirishi AQShning mintaqadagi ittifoqchilariga tahdid solishi mumkinligini aytgan.
Izoh (0)