Ҳиндистон ҳукумати коронавируснинг янги — «дельта плюс» штамми хавфидан огоҳлантирди

Ҳиндистон Соғлиқни сақлаш вазирлиги аҳоли зич жойлашган Махараштра, Керала ва Мадхя-Прадеш штатлари ҳокимиятларини коронавируснинг «дельта-плюс» деб номланган янги тури хавфидан огоҳлантирди. Бу тур кўплаб мамлакатларда тарқалаётган «дельта» штаммнинг янги варианти, деб ёзади «РБК».

Ҳиндистон ҳукумати матбуот хизмати COVID-19’ни ўрганаётган INSACOG илмий маркази томонидан тақдим этилган тадқиқот натижаларини маълум қилди. Бир неча ўнлаб ҳинд лабораториялари олимларининг фикрига кўра, «дельта-плюс» ҳақиқатан ҳам жиддий хавотир уйғотмоқда, чунки у тарқалиш тезлиги, ўпка ҳужайраларига кучли таъсир кўрсатиши билан аввалги штаммдан фарқ қилади. Олимлар, шунингдек, янги штамм антитаналар яратган ҳимояни енгиб ўтишга қодир деб тахмин қилди.

Шу муносабат билан Ҳиндистоннинг бир қатор шаҳарлари маъмурларига коронавирусга қарши чораларни кучайтириш, тест ва эмлаш ҳажмини кўпайтириш бўйича тавсиялар берилди. Шунингдек, янги штамм билан касалланганларни қўшимча равишда текшириш тавсия этилади.

Коронавируснинг «ҳиндча» (дельта) штамми мутацияси бўлган «дельта-плюс» биринчи бўлиб Ҳиндистоннинг Махараштра штатида аниқланган эди.

Эслатиб ўтамиз, 2020 йилнинг октябрь ойида Ҳиндистонда коронавируснинг дельта варианти топилган. Ўшандан бери ушбу штамм мамлакат чегараларидан анча узоққа тарқалди ва кўплаб мамлакатларда, шу жумладан, Европа ва Осиёда қайд этилди.

Аввалроқ Жаҳон соғлиқни сақлаш ташкилоти коронавируснинг дельта варианти бутун дунёда устунликка эришаётгани ҳақида огоҳлантирганди. Таъкидланишича, ушбу тур дунёнинг 80 дан ортиқ давлатида аниқланиб, тарқалиб боргани сари кўпроқ мутацияга учрамоқда.