Бирлашган Миллатлар Ташкилоти дунёда ядро қуролидан фойдаланиш хавфи ортиб бораётгани ҳақида огоҳлантирмоқда. Бу ҳақда ташкилот бош котибининг ўринбосари ва қуролсизланиш масалалари бўйича олий вакили Изуми Накамицу айтиб ўтди.
«Қасддан қилинаётган ҳаракатлар ва ҳодисалар натижасида ядро қуролидан фойдаланиш хавфи Совуқ урушдан кейинги энг юқори даражани кўрсатмоқда», — деди у.
Унинг сўзларига кўра, ташкилот бундан жуда хавотирда. Мавжуд вазиятнинг сабаблари қаторида Накамицу кўп қутбли ядровий тартибни қуриш, минтақавий кескинлик ва қуролланиш пойгасини санаб ўтди. «Биз дипломатик мулоқот етишмовчилигига, шаффофликнинг пасайишига гувоҳ бўляпмиз. Қуролларни назорат қилиш режими қулаб бормоқда», — дея қўшимча қилди у.
Июнь ойи бошида БМТ бош котиби Россия ва АҚШни ядро қуролларини қисқартириш тўғрисида келишиб олишга чақирган эди. «Мен иккала мамлакатни ҳам ядро қуролларини қисқартириш бўйича музокаралар олиб бориш ва пайдо бўлаётган муаммоларга ечим топиш учун янги келишувларни ишлаб чиқишга чақираман», — деган у.
Аввалроқ Стокгольм тинчлик тадқиқотлари институти (SIPRI) 2021 йил бошига келиб бутун дунёда жанговар ҳолатга келтирилган ядровий каллаклар кўпайгани ҳақида хабар берган эди. Институт, шунингдек, Россия ва Қўшма Штатлар дунёдаги ядро қуролларининг 90 фоиздан ортиғига эгалик қилишини таъкидлаган. Ташкилот маълумотларига кўра, йил бошида ядро қуролларининг умумий сони 13 080 тани ташкил этган, шулардан 3825 таси жанговар ҳолатга келтирилган.
Маълумот учун, бутун дунёда ядро қуролига эга мамлакатлар ушбу турдаги қуролга 2020 йилда 72,6 миллиард доллар сарфлаган. Дақиқаларга ҳисоблаганда, мамлакатлар ядро қуроли учун ҳар дақиқада 137 666 доллар сарфлаган.
Изоҳ (0)