Франция шимоли-ғарбидаги Бретан туманида Ксаве Буже исмли 80 ёшли нафақахўр каптар билан дўстлашиб олди, деб хабар беради Esquire.
The Guardian’нинг ёзишича, ноодатий дўстлик Буже кичкина каптарнинг ҳаётини сақлаб қолганидан сўнг бошланган. Кунларнинг бирида Ксаве уйи олдида хавотирли воқеанинг гувоҳига айланган: ҳали оёқда туришни ўрганмаган каптар боласи мушукдан беркинишга уринган.
«Куни ўхшамаган яна бир жонзот», — дея ҳаёлидан ўтказган нафақахўр уйига кириб кетган.
Содир бўлган воқеани рафиқасига айтганида, аёл Ксаведан нима учун қушни қутқармаганини сўраган. Натижада француз каптарга ёрдам беришга қарор қилган ва уни Бланшон деб атаган.
«Ҳамёнимга Бланшонни солган ҳолда уйга қайтдим», — дея эслайди Буже.
Шундан буён эркак ва каптар ажралмас дўстга айланган. Кўпчилик француздан қандай қилиб қушни қўлга ўргатганини сўрайди:
«Ҳар қандай инсон ҳайвон билан алоқани йўлга қўя олади. Аввало ҳайвонни унинг мавжудлиги учун ҳурмат қилиш керак, ахир ушбу жонзот биз билан битта сайёрада яшайди. Улар қандай яшашини тушуниш учун сабр қилиш ва улар бизнинг ҳаётга мослашгани каби биз ҳам уларнинг ҳаётига мослашишимиз керак».
Изоҳ (0)