Ялтадаги тимсоҳлар сақланадиган маскан сув остида қолди. Ходимлар бутун ферма бўйлаб тарқалган тимсоҳларни тутиш билан овора (видео)

18 июнь куни кузатилган ёғингарчилик сабаб Ялтадаги крокодиляриумни бутунлай сув босди, деб хабар беради Esquire. Орадан икки кун ўтган бўлишига қарамай, ходимлар сув тошқини оқибатлари билан курашишда давом этмоқда, шунингдек, ижтимоий тармоқларга тимсоҳларни тутиш жараёнига оид роликларни жойлаштириб келяпти.

Рептилиялар сақланувчи крокодиляриум шаҳар марказидаги ферманинг пастки қисмида жойлашган. Маълум қилинишича, судралиб юрувчи йиртқич жонзотлар шаҳарга чиқиб кетмаган, бироқ крокодиляриумнинг бутун ҳудуди бўйлаб тарқалган.

«Бино бутунлай сув остида қолган. Сўнгги сонияларда деярли барча эвакуация қилинди», — дейди крокодиляриум директори Виктор Жиленко. Тимсоҳлар сақланадиган мазкур масканнинг Instagram’даги саҳифасига ходимлар томонидан судралиб юрувчиларнинг қўлга олиниши тасвирланган фото ва видеолар жойлаштирилмоқда.

https://www.instagram.com/p/CQUBl2gp9vJ/

«Айрим жонзотлар Алуштинский аквариумига, баъзилари Ялта крокодиляриуми ходимларининг уйларига олиб борилди. Бунинг учун зудлик билан зарур шароит яратилган — ҳайвонлар вақтинча ванналарда, балконлардаги катта сиғимли идишларда яшамоқда», — дейилади муассаса сайтида.

https://www.instagram.com/p/CQT9CAWJmfb/

Ходимларнинг сўзларига кўра, крокодиляриумда яшовчи жонзотларга ҳеч нарса қилмаган ва улар соғлом.

Эслатиб ўтамиз, 17 июнь куни Қримда кузатилган кучли ёғингарчилик оқибатида дарё ўзанлари тошиб кетган. Айниқса, Керч ва Ялтага жиддий зарар етгани айтилмоқда. Сув тошқинлари оқибатида бир киши ҳалок бўлган, икки киши бедарак йўқолган ва 24 киши жароҳат олган.