Хитойлик Ю Цзяньса дунёдаги энг узун киприклар эгаси. Киприклари 2015 йилдан бошлаб сезиларли ўсишни бошлаган аёлнинг исми орадан икки йил ўтиб Гиннеснинг рекордлар китобидан ўрин олди. Бу вақтда унинг киприклари 13 сантиметр узунликда бўлган.

2020 йилда эса киприклари 20,5 сантиметр бўлган аёл ўзининг рекордини янгилаган. Киприкларининг бунчалик узунлиги сабабини на шифокорлар, на аёлнинг ўзи билади. «Мен учраган бир қанча шифокорлар ҳеч қандай муаммо топишмаган ва мени шунчаки мўъжиза деб аташган. Кейинчалик мен буни ген ва ирсият билан боғлиқ, деб ўйлай бошладим, аммо қариндошларимда бундай ўзига хослик йўқ», — деган Ю.

Хитойлик аёл киприклари билан бирга саломатлиги мустаҳкамлангани сабаб ҳам буни илоҳий иноят деб ҳисоблайди. «Қизиғи, мен болалигимда жуда нимжон ва кўп касал бўлганман, киприкларим ўсишни бошлаганидан кейин эса саломатлигим жисмонан яхшилана бошлади», — деган аёл.

Аёлнинг айтишича, ушбу ўзига хослик унга макияжга вақт тежашга ёрдам беради. Узун киприклари халақит қилмаслиги учун уларни қулоғининг орқасига ўтказиб олади. У Гиннеснинг рекордлар китобидан ўрин олганидан жуда ҳам хурсанд.