Австралияда «Формула-1» услубидаги ҳаво пойгаларида иштирок этишга мўлжалланган электромобиль синовдан ўтказилди

Австралия чўлларида келажакда «Формула-1» каби беллашувларда иштирок этадиган тўрт метрли Alauda Airspeeder Mk3 пойга электромобилининг илк синовлари бўлиб ўтди, деб хабар беради Esquire.

Тест давомида мультикоптер учувчисиз бошқариладиган режимда парвоз қилган, бироқ синовлар муваффақиятли якунланса, у учувчи томонидан бошқарилади. Электромобиль оғирлиги 130 килограммни ташкил этади ва соатига 250 километр тезликда ҳаракатланиши мумкин. Батарея қуввати 15 дақиқа парвозга етади, шу сабабли 45 дақиқали пойгалар учун батареяларни икки маротаба алмаштириш талаб этилади — бунга, тахминан, 20 сония вақт кетади.

2021 йилнинг ўзида электромобилларнинг учта ҳаво пойгаси ўтказилиши кутилмоқда, уларнинг ҳар бирида ўнга яқин бошқарилувчи учар машиналар қатнашади. Alauda Airspeeder Mk3’ни яратган фирма асосчиси Метью Пирсоннинг сўзларига кўра, бу «шунчаки пойга бўлмайди». Унинг мақсади — шу турдаги электромобилларнинг оддий шаҳар ҳаётига жорий этилишини тезлаштиришдан иборат.

Аввалроқ Москвада бир марта қувватланиш орқали 100 км йўл боса оладиган ҳаво таксиси синовдан ўтказилгани, Hyundai 2025 йилга бориб аэропортларда учар таксилар хизматини ишга туширишни режалаштираётгани тўғрисида хабар берилганди.