Ижтимоий тармоқларда эвакуаторга ортилган 710 от кучига эга Ferrari F8 Tributo автомобилининг видеоси тарқалди. Маълум бўлишича, Лас-Вегасда истиқомат қилувчи фуқаролардан бири суперкарни маҳаллий компаниядан ижарага олган. Орадан бир оз вақт ўтиб у фирма вакиллари билан боғланган ва тошни босиб кетиши оқибатида автомобилни уриб олганини маълум қилган, деб хабар беради Motor.
Маҳаллий фуқаролардан бири 350 минг доллар турадиган ёрқин қизил рангли Ferrari F8 Tributo’да Лас-Вегас кўчалари бўйлаб ҳаракатланишни истаган. Бироқ барчаси ҳайдовчи ўйлаганидек бўлиб чиқмаган. Машина ижарага олинганидан бир неча соат ўтиб, эркак каттароқ тошни босиб кетиши оқибатида спорткарга бир оз шикаст етган.
Воқеа жойига етиб келган фирма вакиллари ҳайдовчининг версиясини шубҳа остига олган. Мутахассислар олд сплиттерга етган зарарга, ишга тушган хавфсизлик ёстиқчаси, шунингдек, синган ғилдирак дискалари ва қанот қисмининг бир бўлаги узилиб тушганига эътибор қаратган. Бундан ташқари, экспертлар йўлда кузовнинг асфальт бўйлаб сирпаниш изларини кўрган, бу эса тормоз йўлининг узунлигидан далолат беради.
Ferrari F8 Tributo компанияга қайтарилиши билан муҳандислардан бири суперкарни кўздан кечиришга киришган. Эксперт машинанинг ост қисмидаги тирналишлар ва ғилдирак аркаларининг ичига жиддий шикаст етганини таъкидлаган. Бироқ санаб ўтилган нуқсонларнинг бирортаси қоқ иккига бўлинган автомобиль «подвеска»си билан тенглаша олмайди. Техник мутахассиснинг маълум қилишича, бу каби шикаст фақатгина кучли зарба оқибатида юзага келиши мумкин. Ижарага олинган автомобиль суғурта қилинганига қарамай, фирма мижозини суғурта компанияси билан жиддий суҳбат кутмоқда.
Аввалроқ АҚШда салондан миниб чиқилган янги Toyota Supra дарахтга урилгани, шунингдек, янги Chevrolet Corvette харид қилинганидан бир кун ўтиб ЙТҲга учрагани тўғрисида хабар берилганди.
Изоҳ (0)