Абрамовнинг «ҳайдалиши», Аҳмедовнинг кутилмаган қарори ва «гап эшитган» Азиз Ҳайдаров. ЎФАнинг навбатдан ташқари конгрессида рўй берган асосий воқеалар (фото)

Миллий Олимпия қўмитаси биносида 19 июнь, шанба куни Ўзбекистон футбол ассоциациясининг навбатдан ташқари конгресси бўлиб ўтди.

ЎФА президенти Абдусалом Азизов маросимни ўз нутқи билан очиб берди (батафсил).

Футболда ғалаба ва мағлубият ёнма-ён юради. Шу кунларда миллий терма жамоамизнинг мағлубияти мухлисларимизни жудаям ранжитди. Ушбу мавзу юзасидан Ўзбекистон футбол ассоциацияси бугунги йиғилишдан кейин ҳисобот беради ва терма жамоа ҳолатига баҳо беради.

Абдусалом Азизов, ЎФА президенти

Конгресснинг кун тартибидан қуйидаги масалалардан иборат бўлди:

1. ЎФА уставини ФИФА ва ОФК талаблари асосида янги таҳрирда тасдиқлаш;

2. ЎФА сайлов кодексини тасдиқлаш;

3. ЎФА сайлов қўмитасини тасдиқлаш;

4. ЎФА апелляция сайлов қўмитасини тасдиқлаш.

Ташкилий масалалар ижроқўм билан бирга муҳокама қилингач, Ўзбекистон терма жамоасининг ЖЧ—2022 саралаш босқичидаги муваффақиятсиз иштироки кун тартибига чиқди.

Аввалига ЎФА биринчи вице-президенти Равшан Эрматов сўзга чиқди.

2019 йилда ҳурматли Президент Шавкат Мирзиёев «Ўзбекистонда футбол ривожини мутлақо янги босқичга олиб чиқиш чора-тадбирлари тўғрисида»ги фармонига имзо чекди. Ушбу фармон узоқ муддатли ривожланиш режасини ўз ичига олган бўлиб, унда 2030 йилгача футболни ривожлантириш концепцияси, йўл харитаси ва мақсадли кўрсаткичлар белгилаб берилган. Фармонда қайд этилган топшириқлар босқичма босқич ўз вақтида амалга оширилиб келинмоқда. Жумладан, 14 та ҳудудий футбол ассоциациялари фаолияти таҳлил ўтказиш натижасида тубдан ислоҳ қилиниб, қайтадан ташкил этилди ва уларга тажрибали футбол мутахассислари жалб этилди. Вилоят жамоалари ва терма жамоаларга маҳоратли футболчилар етказиб бериш тизими асталик билан йўлга қўйиляпти.

Ўзбекистон футбол ассоциацияси тизимида терма жамоалар бўлими қайта ташкил этилиб, унга Ўзбекистон миллий терма жамоасида кўп йиллар давомида тўп сурган Азиз Ҳайдаров бўлим бошлиғи этиб тайинланди. Бўлимга миллий ҳамда турли ёш тоифаларидаги Ўзбекистон терма жамоалари фаолиятини тизимли равишда мувофиқлаштириш, халқаро ўртоқлик учрашувлари ташкил этиш, нуфузли мусобақаларга тайёргарлик кўриш ва уларда муваффақиятли иштирок этиш каби вазифалар юкланди. Энг асосийси футболчиларни ўсмирлар терма жамоасидан то миллий терма жамоагача бўлган даврда ўзбек футболи менталитетидан келиб чиққан ҳолда ягона услуб ва ўйин фалсафасини ишлаб чиқиш ва терма жамоалар ўйинида жорий этиш мақсад қилиб қўйилган.

2019 йил сентябрь ойида ЎФА қошидаги мураббийлар кенгаши қарори ва кўп сонли футбол мухлисларининг таклиф ва истакларини инобатга олган ҳолда Вадим Абрамов Ўзбекистон миллий терма жамоаси бош мураббийи этиб тайинланди ва унга 2022 йилги Жаҳон Чемпионатига олиб чиқиш вазифаси юклатилди. Мураббийлар штабининг талаби ва режаси асосида миллий терма жамоа тайёргарлиги учун ЎФА томонидан барча молиявий ва ташкилий масалалар ўз вақтида бажарилди. Жумладан, 10 та ўқув-йиғин машғулотлари, 4 та назорат учрашуви, 12 та халқаро ўртоқлик учрашувлари ташкил қилинди.

Ҳурматли йиғилиш иштирокчилари, албатта, барчамизнинг асосий орзумиз Жаҳон Чемпионатига чиқиш. ЎФАнинг қилаётган барча саъй-ҳаракатлари ҳам пастдан бошлаб то тепагача футболни ривожлантиришни тизимли йўлга қўйиш, ушбу тизимни йўлга қўйишни уддаламагунимизча йирик мусобақаларда барқарорликка эришишимиз қийин бўлади. Буни қисқа вақт ичида йўлга қўйиш осон эмас. Иш бор жойда камчилик бўлганидек, ЎФАнинг ёш жамоаси фаолиятида ҳам хато ва камчиликлар бўлиб турибди. Биз уларни бартараф этиш учун доимий изланишдамиз ва меҳнат қиляпмиз. Бу борада биз ОАВ, футбол жамоатчилиги, мухлислар фикрини ҳам инобатга олиб ишлаяпмиз. Ишончимиз комилки, юқорида тилга олинган ишлар ва олдимизга қўйилган режалар футболимизни тизимли ривожлантириб, натижалар барқарор бўлишини таъминлайди.

Равшан Эрматов, ЎФА биринчи вице-президенти

Шундан кейин сўз Ўзбекистон миллий терма жамоаси бош мураббийи Вадим Абрамовга берилди.

Терма жамоани 2019 йилда Фаластинга учралган мағлубиятдан сўнг қабул қилиб олдим. Мен ва мураббийлар штаби олдига Жаҳон Чемпионатига чиқиш вазифаси қўйилди. Фаластинга қарши ўйиндан сўнг тайёргарлик учун вақт бўлмади. Мураббийлар штаби томонидан таркибнинг 70 фоизини алмаштирилди. Фаластинга ва Яманга қарши ўйинларгача қарасангиз, биринчи учрашувдаги фақат 4 нафар футболчи таркибга жалб этилганини кўришингиз мумкин. Биз Яманни 5:0 ва меҳмонда Сингапурни 3:1 ҳисобида мағлубиятга учратдик. Шундан сўнг Саудия Арабистонига қарши ўйнадик ва, афсуски, асосий рақибимизга 3:2 ҳисобида мағлуб бўлдик. Агар ўша ўйинни эсласангиз, 2018 йилги мундиалда иштирок этган Саудия Арабистони футболчиларидан фарқли равишда бизнинг футболчиларнинг тажрибаси камлигини кўришингиз мумкин. Таркибда тажрибали футболчилар етишмади. Саудия Арабистонида Осиёнинг бир неча бор чемпион бўлган жамоаларида тўп сурадиган футболчилари бор. Бунинг ўзи ҳам кўп нарсаларни билдиради. 3:2 ҳисобидаги мағлубият бизнинг вазифамизни қийинлаштириб юборди.

Лекин Фаластинни 2:0 ҳисобида ютганимиздан кейин гуруҳдан чиқишимиз учун яхши имконият пайдо бўлди. Кейинги 3 ўйинда 6 очко жамғарсак, 2-ўрин билан чиқишга имконият пайдо бўларди. Бу оддий арифметик ҳисоб-китоб. Афсуски, бутун дунёда пандемия билан боғлиқ муаммолар пайдо бўлди ва мусобақа тўхтатилди. Шундан сўнг ОФК Шимолий Корея саралаш ўйинларида иштирок этмаслигини айтди. Гуруҳда охирги ўринни эгаллаган жамоа билан бўлиб ўтган ўйинларда 6 очко айириб ташланишини эълон қилди. Биз Яман ва Сингапурни енгиб 6 очко жамғарган бўлсак, мусобақа жадвалида 15 очко билан иккинчи ўринни эгалладик. Лекин бизнинг ўрнимизга Ливан кейинги босқичга йўл олди.

Нима дейишим мумкин, биз ўтказган охирги йиғинларда қўлимиздан келган барчасини амалга оширдик. Биз мағлубиятга учрадик, барча жавобгарлик менинг бўйнимда. Мураббийлар штаби бошлиғи сифатида масъулиятни зиммамга оламан. Барча футбол мухлисларидан узр сўрайман. Агар муваффақиятли иштирок этганимизда бугун сизларни бу ерга йиғмасдик. Биз жавоб беришга тайёрмиз. Бир нарсани айтиб ўтмоқчиман: бу вақт давомида 75 футболчи терма жамоада майдонга тушган бўлса, 20 нафар футболчи терма жамоада ўз дебютини ўтказди. Терма жамоанинг келажаги бор, деб ўйлайман. Уларни тўғри йўналтира олиш зарур. Мен ишлаган давримда марказий ҳимоячилар ва дарвозабонларни тайёргарлиги борасида ишларни амалга ошира олмадик. Бу охирги босқичда ҳам кўринди. Бу муаммо ечилмай қолди.

Вадим Абрамов, Ўзбекистон терма жамоаси собиқ бош мураббийи

Абрамов сўзини якунлаганидан кейин Ўзбекистон Президентининг ёшлар, фан, таълим, соғлиқни сақлаш, маданият ва спорт масалалари бўйича маслаҳатчиси Абдужаббор Абдувоҳидов мураббийга савол билан мурожаат қилди ва терма жамоа нима сабабдан Саудия Арабистонига қарши сўнгги ўйинда тактик ўзгаришларга қўл урганига изоҳ сўради.

Биз рақибни фақат прессингдан ушлашимиз керак эди. Шундай қилишмиз керак эдики, рақиб бизнинг ярим майдонга ўта олмаслиги лозим эди. Тошкентдаги ўйинда буни амалга ошира олгандик ва уларнинг ўйини чиқмаганди. Бироқ Саудиядаги об-ҳаво шароити бундай ўйнашга йўл қўймасди.

Одил Аҳмедовга келсак, футболчилар менга чиқди ва сўнгги ўйинда Аҳмедовни ҳимояда ўйнатишни маслаҳат берди. Азиз Ҳайдаров келди ва футболчилар шуни истаётганини айтди. Жамоавий ишда қолганларнинг фикрига қулоқ солиш муҳим ҳисобланади.

Уларга қарши ҳимоявий ўйин намойиш қилмоқчи эдик, бироқ биринчи қарши ҳужумдаёқ гол ўтказиб юбордик. Афсуски, тезкор гол қўйиб юбордик. Агар юқори даражали марказий ҳимоячилар бўлганида балки бошқа натижа бўларди. Сингапур терма жамоаси 85 дақиқа уларга қарши хотиржам ўйнаганди.

Вадим Абрамов

Кейин Абдусалом Азизов томонидан Абрамовга савол бериш таклиф этилди. (Қайд этиш керак, маросимдан аввал ташкилотчилар журналистларга конгресс вақтида саволлар бўлмаслиги ва фақат кузатиш имконияти бўлиши айтганди).

Фаррух Икромовнинг терма жамоага жалб этилгани ҳақида

Статистика қараб фақат космонавтлар танланади, футболчилар бу орқали танланмайди. Икромовнинг келажаги буюк. У Саудияга қарши ўйинда терма жамоага лойиқ эканини исботлади.

Тайёргарлик жараёни ҳақида

Коронавирус кўплаб режаларни барбод қилди. Ўзбекистондан фарқли ўлароқ Саудияда легионер футболчилар йўқ. Бизда турли мамлакатларда тўп сурадиган ўйинчилар бор. Австралияга қарши ўйин уларнинг илтимоси билан бекор қилинди, рақиб мураббийи бунинг учун кечирим ҳам сўради. Ундан аввал Туркманистон билан ўйин бўлди. Умуман олганда, Саудияга қарши ўйингача ҳаммаси яхши кетаётганди. Бироқ сўнгги ўйин биз у қадар яхши тайёр эмаслигимизни кўрсатди.

Истеъфо борасида

Албатта, бу ҳақида гап-сўз бўлиши мумкин эмас. Шусиз ҳам июнь ойида шартномам якунига етади.

Анзур Исмоловнинг жалб этилмагани ҳақида

Исмоиловга охиригача ишонгандим. Бироқ сўнгги лаҳзада у рад этди. Сабабини билмайман. Бу мен учун кутилмаган ҳолат бўлди. Кримецга келадиган бўлсак, охирги йилларда унда терма жамоада ўйнаш тажрибаси йўқ эди.

Вадим Абрамов

Шундан кейин терма жамоалар бўлими бошлиғи Азиз Ҳайдаров сўзга чиқди.

Гапимни футбол мухлисларидан узр сўраш билан бошламоқчиман. Чунки олдимизга қўйилган вазифа Жаҳон Чемпионатига чиқиш эди. Терма жамоа учун ҳамма шароитларни яратиб бердик. Ўйинлар ҳам ташкил қилинди, барча имкониятлар яратилди. Ўйинга келадиган бўлсак, бир масалага тўхталиб кетаман: Вадим Абрамов айтганидек, ўйиндан олдин йигитлар менга иложи бўлса Одил Аҳмедов ҳимоя ўйнашини таклиф қилди. Шу мурожаатни Вадим Карленовичга етказдим. Оғир ўйинлар олдидан етакчи футболчилар билан мураббий суҳбатлашиши керак. Бир иш бажарилаётганда бир бирини қўллаб-қувватлаши зарур. Шунинг ортидан катта ғалабаларга эришиш мумкин.

Энг катта муаммомизни ҳар доим айтиб келганман. Тактик жиҳатдан доим камчилигимиз бўлган. Бу ҳақида доим сўраб келдим, барибир охирида шу нарсага дуч келдим. Бизда битта режа бор эди, агарда 2-3 та режамиз бўлганда ўйинга бошқача ёндашган бўлардик. Бу нарсадан ҳаммамиз ўрнак олишимиз керак. Ўйлайманки, футболчилар ҳам, мураббийлар ҳам, футбол атрофидаги одамлар ҳам бундан тўғри хулоса чиқаради. U-19 Аёллар терма жамоамиз Лобановский мусобақасида ғолиб бўлиб келди, лекин миллий терма жамоамизда ғалабалар бўлмаса, қилаётган кичик яхши ишларимиз кўринмайди.

Бутун мураббийлар келишилган ҳолда битта йўналишда ишлаб, ёшларимиз бир бирини тушуниб ишласа, ўйлайманки, ўшанда иш тўғри йўлга қўйилади. Бир нарсани илтимос қилиб қолардим, ҳар йили кичик майдонлар ташкил қилишимиз, футболчилар учун яна нимадирлар қилишимиз лозим. Бўлмаса бошқа давлатлардан анча ортда қолиб кетяпмиз. Бу ҳақиқат. Ўзимиздан кучсиз деб ҳисоблайдиган футбол терма жамоаларининг инфратузилмаларига, футболчилар учун яратиб бераётган имкониятларига қарасак улар биздан анча олдинда.

Энди бўлиб ўтган ишларга айбдор инсонларни қидиравериш эмас, тўғри йўлда ҳаммамиз давом этишимиз лозим. Футболимиз жар ёқасига келиб қолишига футбол атрофидаги барчамиз айбдормиз. Ҳалоллик ва шаффофликда давом этсак, худо ҳам йўлимизни очиб беради. Ўзим 3 марта Жаҳон Чемпионати саралашида қатнашган бўлсам, ҳар доим нимадир етмай қоларди. Баъзан очко, баъзан гол етмай қоларди. Бир нарсани таъкидлайман: бизга ҳалоллик етишмаяпти. Ҳалоллик бўлса, ҳамма нарса ўз жойига тушади.

Азиз Ҳайдаров, терма жамоалар бўлими бошлиғи

Ўзбекистон терма жамоаси сардори Одил Аҳмедов ҳам ўз фикрларини билдирди ва терма жамоадаги фаолиятини якунлашини маълум қилди.

Шу жойда жуда кўп гапирилди. Аммо битта нарсани айтмоқчиман: футболни алдаб бўлмайди. Бугун ўзгармасак, ҳар 4 йилда шундай туриб кечирим сўраймиз.

Футболчи бўладими, мураббий бўладими, шу соҳадаги одам бўладими — футболнинг манфаатини биринчи ўринга қўймаса, бизда ҳеч қачон натижа бўлмайди. Бу катта деталлардан бири. Майдалари эса жуда кўп.

Агар мен бу ҳақида гапирадиган бўлсам, баҳонага ўхшаб қолади. Футбол соҳасида ишлайдиган одамлар бор, улар яхши тушунади. Энг катта муаммоларимиздан бири болалар футболида тўғри йўл тутмаётганимиз.

Терма жамоадаги фаолиятимни якунладим.

Одил Аҳмедов, футболчи

Орада ўзбек футболи фахрийси Биродар Абдураимов Одил Аҳмедовнинг Саудия Арабистонига қарши ўйиндаги ҳаракатларини танқид остига олди (батафсил).

Сўнгги сўз Абдусалом Азизовга берилди. Унда ЎФА раҳбари футболдаги қинғир ҳолатларга тўхталиб ўтди (батафсил).

Маошлар сиёсати, менежментда ҳам биз ортдамиз. Азиз Ҳайдаров кўплаб ишларни амалга оширдик деяпти-ку, бироқ амалда ташкилий масалаларда у ҳам кўплаб камчиликларга йўл қўйди. Саудия Арабистонига етиб борганда меҳмонхона қониқтирмади, аэропортлардаги муаммо ва ҳоказо майда муаммолар футболчиларинг кайфиятига таъсир қилмасдан қолмайди. Одам аввал ўзининг ишини ипидан игнасигача қилиб қўйиб, ундан кейин интервью бериши ва гапириши керак.

Абдусалом Азизов, ЎФА раҳбари

Маросим сўнгида Азизов Ўзбекистон миллий терма жамоаси бош мураббийи Вадим Абрамов билан шартнома тугатилишини эълон қилди.