Андижон давлат тиббиёт институтида янги таълим йўналиши бўйича бакалавр тайёрлаш йўлга қўйилади
Андижон давлат тиббиёт институтида 2021/2022-ўқув йилидан бошлаб «Саноат фармацияси» таълим йўналиши бўйича бакалавр тайёрлаш йўлга қўйилади. Бу ҳақда 18 июнь куни Президент Шавкат Мирзиёев раислигида Андижон вилояти фаоллари билан ўтказилган йиғилишда давлат раҳбари таъкидлади, деб хабар бермоқда «Дарё» мухбири.
ДТИ матбуот хизмати" data-action="zoom" class="border lazyload" />
«Андижон давлат тиббиёт институтининг кафедра мудирлари туман ва шаҳар тиббиёт бирлашмалари фаолиятига амалий ёрдам бериш учун масъул сифатида бириктирилади. Бундан ташқари, икки ой муддатда Андижон давлат тиббиёт институти клиникасида ангиограф аппарати ўрнатилиб, юрак-қон томир тизимида ўтказиладиган жарроҳлик операцияларининг тури ва сони кўпайтирилади», — деди давлат раҳбари.
Аввалроқ Андижонда мураккаб операцияларга муҳтож, эҳтиёжманд аҳолига ёрдам бериш бўйича махсус жамғарма ташкил этилиши ҳақида хабар берилган эди.
Эслатиб ўтамиз, Президентнинг 2020 йил июнь ойидаги қарори асосида Тошкент давлат аграр университети Андижон филиали негизида Андижон қишлоқ хўжалиги ва агротехнологиялар институти ташкил этилганди. Институтда таълим фаолияти 2020/2021-ўқув йилидан бошланди. Шу ўқув йилидан Андижон иқтисодиёт ва қурилиш институти ҳам ташкил этилди.
