Жорий йил 26 апрель куни тонгга яқин Наманган вилоятининг Тўрақўрғон туманидаги «Бахт» маҳалласида босқинчилик жинояти содир этилди. Бу ҳақда «Дарё» мухбири Азизбек Абдувалиев хабар бермоқда.

Ушбу маҳалла фуқароси А.А.нинг яшаш уйига юзини ниқоб билан тўсган номаълум кимсалар кириб, хонадон эгасини тахта бўлаги ва қўллари билан аёвсиз уриб, дўппослашади, сўнг унга тегишли Note 7 русумли қўл телефонини олиб, ғойиб бўлишади.

Туман ички ишлар бўлимининг тезкор гуруҳи воқеа жойига борганида шубҳали ҳолатга дуч келди: қўл телефонидан ташқари кўзга кўринарли жойда 500 минг сўм ҳам турган, бироқ пулга тегилмаган.

Бу саволга жавоб топиш унчалик қийин бўлмади. Шу ҳудудда жойлашган 54-умумтаълим мактаби теварагига қўйилган видеокузатув воситаси ёрдамида Damas автомобили воқеа рўй берган вақт оралиғида икки марта мазкур йўлдан ўтгани аниқланди.

Ҳайдовчи сўроқ қилинганида ҳақиқатан ҳам икки кишини шу маҳаллага ташлаб кетгани, бир соатлардан сўнг қайтиб олиб кетишга келишилгани, айтилган вақтда келгани, бироқ улар чиқишмагани, мижозларни кута-кута ортга қайтганини айтиб берди.

«Жиноятчилар тезда топилди. Қизиғи, икки йигитни ҳам шу хонадон бекасининг ўзи ёллаган экан. Турмуш ўртоғининг бошқа аёл билан алоқалари борлигидан шубҳа қилиб, рашк туфайли аламидан чиқмоқчи бўлган. Бу ниятини гумонланувчиларнинг бири — жияни орқали амалга оширмоқчи бўлган. Хизмат эвазига йигитга бошдан-оёқ кийим олиб берган»,—дейди Тўрақўрғон тумани ИИБ катта терговчиси, катта лейтенант Акмалжон Ҳакимов.

Ҳозирда мазкур ҳолат юзасидан жиноят иши қўзғатилиб, тергов-суриштирув ишлари олиб борилмоқда.