Ўзбекистоннинг барча ҳудудларида «Авто 60 ой»дан жабр кўрган фуқароларга пулларини қайтариш бўйича ишчи гуруҳлар тузилди

Қорақалпоғистон, Тошкент шаҳар ва вилоятларда «Авто 60 ой» МЧЖдан жабр кўрган фуқароларга пулларини қайтариш бўйича ишчи гуруҳ тузилди, дея «Дарё»га хабар бермоқда Мажбурий ижро бюроси матбуот хизмати.

«Авто 60 ой» мансабдор шахслари Ж.Б. ва бошқаларнинг жиноий ҳаракатлари натижасида жабр кўрган фуқароларга етказилган моддий зарарларни қоплаш мақсадида Бош прокуратура ҳузуридаги Мажбурий ижро бюроси ходимларидан иборат таркибда Қорақалпоғистон, Тошкент шаҳар ва вилоятларда ишчи гуруҳлар ташкил этилди.

Ҳозирда ишчи гуруҳларга 2144 нафар фуқаро мурожаат қилиб, ўзларига тегишли ҳисоб рақамлар ҳақидаги маълумотларни тақдим қилган.

Шунингдек, моддий зарарни қайтариш масаласида мурожаат этмаган фуқароларга ҳудудларда ташкил этилган ишчи гуруҳларга мурожаат қилишлари ва етказилган зарарлар қисқа муддатда уларнинг ҳисоб рақамларига ўтказилиши эслатиб ўтилган.

«Жамиятдан жабр кўрган фуқароларимизнинг аксарияти вилоятларда яшашлигини инобатга олиб, уларга янада қулайлик яратиш ва ортиқча оворагарчиликларнинг олдини олиш мақсадида қуйидаги манзилларга шахсини тасдиқловчи ҳужжатлар (фуқаролик паспорти) ҳамда пластик карточкалари билан Мажбурий ижро бюросининг ҳудудий бошқармаларига (душанба-жума кунлари соат 09:00 дан 18:00 га қадар) мурожаат қилишлари сўралади», — дейилади хабарда.

Эслатиб ўтамиз, «Авто 60 ой» МЧЖнинг мансабдор шахслари ва бошқаларга нисбатан 2019 йил 12 октябрь куни Жиноят кодексининг 188-1-моддаси 1-қисми (пул маблағларини ва (ёки) бошқа мол-мулкни жалб этишга доир ноқонуний фаолият) билан жиноят иши қўзғатилган эди.

Тергов жараёнида Ж.Б. ўзининг жиноий шериклари билан олдиндан тил бириктириб, бир гуруҳ бўлиб, «Авто 60 ой» ва Catalea Media МЧЖ ва ЯТТ «Ж.Б.»ни ташкил этиб, 3 ой муддат ичида Ўзбекистонда UzAuto Motors АЖ томонидан ишлаб чиқарилган автомашиналарни етказиб беришни ваъда қилиб, автомашина русумига қараб, 1 миллион сўмдан 10 миллион сўмгача бўлган миқдорда пул олиб, маблағларни қўлга киритгани аниқланган.

Жиноят иши бўйича «Авто 60 ой» МЧЖ бош офисидан олинган бухгалтерия ҳужжатларидаги маълумотлар бўйича 19 344 дан ортиқ шахслар билан шартномалар тузганлиги аниқланган ва ушбу шартномалар жиноят ишига қўшилган. Тергов ҳаракатлари давомида жами етказилган моддий зарар 47,7 миллиард сўм экани аниқланиб, шундан 36,8 миллиард сўм ундирилган.

Суд ҳукмига кўра, Ж.Б. («Авто 60 ой» МЧЖ раҳбари)га узил-кесил ўташ учун 8 йил муддатга озодликдан маҳрум қилиш жазоси тайинланган.