Ҳукумат 14 июнь куни «Ўзбекистон Республикасида сувда дам олиш ва пляж туризмини ривожлантириш чора-тадбирлари тўғрисида»ги қарорни қабул қилди, деб хабар бермоқда Адлия вазирлиги матбуот хизмати.
Қарорга кўра, Жиззах ва Навоий вилоятларининг туристик салоҳиятини ривожлантириш мақсадида Айдар-Арнасой кўллар тизими ҳамда Тўдакўл кўлида рекреацион кўллар ҳудуди ташкил этилади. Шунга кўра, мазкур рекреацион кўллар ҳудудида 2021—2025 йилларда туризмни ривожлантириш концепцияси тасдиқланди.
Рекреацион кўллар ҳудудига кирувчи ер участкаларини тадбиркорларга бериш, уларда қурилиш ва барпо этиш лойиҳаларини амалга ошириш Туризм ва спорт вазирлиги билан мажбурий тартибда келишилади.
Рекреацион кўллар ҳудудига кириш нуқтасида ахборот маркази ва замонавий автотураргоҳ ташкил этилади.
Шунингдек, ташриф буюрувчиларнинг хавфсизлигини таъминлаш мақсадида рекреацион кўллар ҳудудида қутқарув бригадаси фаолияти йўлга қўйилади.
Қарор билан тасдиқланган концепцияни амалга ошириш орқали ҳар бири 5 йиллик даврни ўз ичига олган 3 босқичли қуйидаги натижаларга эришилади:
- биринчи босқичда жами 204 ўринли 6 та жойлаштириш воситаси, шунингдек, ҳудудда экотуристик объектлар, овчилик ва сувда дам олиш ҳудудлари ташкил этилади;
- иккинчи босқичда Айдаркўл атрофидаги 33 минг гектар ҳудудда янги туристик ҳудудлар, жойлаштириш воситаси, соғломлаштириш масканлари, спорт тадбирлари ўтказиладиган майдонлар барпо этилади;
- учинчи босқичда 300 ўринли жойлаштириш воситалари ва спорт тадбирлари ўтказиладиган майдонлар ташкил этилади, 1200 ўринга мўлжалланган автотураргоҳ ҳамда савдо ҳудуди қурилади.
Эслатиб ўтамиз, «Ўзбекистон Республикасида сувда дам олиш ва пляж туризмини ривожлантириш чора-тадбирлари тўғрисида»ги Вазирлар Маҳкамаси қарори лойиҳаси 2021 йилнинг март ойида муҳокамага қўйилганди.
Ўзбекистонда ички туризмни тиклаш ва ривожлантириш мақсадида Айдар-Арнасой кўллар тизимида ва Тўдакўл тизимида дам олиш ҳудудлари ташкил этилиши кўзда тутилгани ҳақида 2020 йилнинг май ойида маълум бўлганди. Президент Шавкат Мирзиёевга тақдим этилган лойиҳаларда Айдар-Арнасой кўллар тизимида Ором қирғоғи (Leisure Coast) сув соҳилбўйи дам олиш маскани ташкил этиш, Айдар-Арнасой кўллар тизими бўйлаб йўловчи ташувчи мунтазам автобус қатновини йўлга қўйиш кўзда тутилгани кўрсатилган.
2020 йилнинг августида Азиз Абдуҳакимов мамлакатда «Бочка» номли сайёҳлик масканига ўхшаш жойларнинг кўпайтирилишини маълум қилганди.
Изоҳ (0)