SkyUp Airlines лоукостер авиакомпанияси Ўзбекистонга мунтазам авиақатновлар учун Украина давлат авиация хизматидан рухсат олди, деб хабар бермоқда Spot.
Маълум қилинишича, 10 июнь кун ушбу авиакомпанияга ҳафтасига бир марта Киевдан Самарқанд ва Урганчга парвоз қилишга рухсат берилди. Ушбу рухсат 2021 йилнинг 12 июнидан 2023 йилнинг 25 мартигача амал қилади.
SkyUp ушбу йўналишда парвоз қилиши учун Ўзбекистон томондан ҳам рухсат олиши лозим. Агар бунга рухсат берилса, ҳар икки мамлакат ўртасидаги авиақатновлар 2015 йилдан буён илк бор қайта тикланади.
Аввалроқ SkyUp Тошкент ва Киев ўртасида ҳар чоршанба қатнаётгани ҳақида хабар берилган эди. Лекин у мунтазам эмас, чартер рейс. Шунга қарамай, ушбу авиачипталар эркин сотилмоқда.
Ўзбекистон ва Украина ўртасида тўғридан-тўғри доимий парвозларни тиклаш масаласи узоқ вақтдан бери муҳокама қилиб келинмоқда. Uzbekistan Airways Тошкент—Киев—Тошкент йўналишида парвозларни амалга оширишни 2015 йилнинг май ойида тўхтатган, ўша йилнинг сентябрь ойида эса Украина пойтахтидаги офисини ёпган.
Ўшанда «Украина халқаро авиалиниялари» (МАУ) компанияси ҳам мазкур йўналишдаги парвозларини тўхтатган — можаро Украина авиакомпаниясининг эҳтимолий устунлигидан келиб чиққан, у Бориспол аэропорти орқали амалга ошириладиган транзит ёрдамида йўловчи оқимининг бир қисмини олиб қўйган.
Ўзбекистон Украина компаниясидан парвозлар частотасини ҳафтасига иккитадан биттага камайтиришни талаб қилган, бунинг оқибатида «Украина халқаро авиалиниялари»нинг транзит модели самарали ишлашдан тўхташи мумкин эди. «Украина халқаро авиалиниялари» парвозлар частотасини камайтиришга рози бўлмаган, бунинг оқибатида икки мамлакат ўртасидаги тўғридан-тўғри авиақатновлар тўхтатилган.
Ҳар икки давлат тўғридан-тўғри парвозларни 2021 йил май ойида тиклаши ҳақида транспорт вазири, Uzbekistan Airways раиси Илҳом Маҳкамов 28 апрель куни бўлиб ўтган матбуот анжуманида маълум қилганди.
Изоҳ (0)