Ҳожимат Эркинов Ўзбекистон терма жамоаси лагерини тарк этди. У Сингапурга қарши ўйинда жароҳат олганди

Ўзбекистон миллий терма жамоаси ярим ҳимоячиси Ҳожимат Эркинов терма жамоа лагерини тарк этди, дея ёзмоқда ЎФА матбуот хизмати.

Қайд этилишича, 20 ёшли футболчи Сингапурга қарши ўйинда олган жароҳати сабабли 11 июнь куни Саудия Арабистонидан Тошкентга йўл олган. Шунингдек, Эркиновнинг Тошкентда қўшимча текширувлардан ўтиши ва тўлиқ тиббий назоратда бўлиши қўшимча қилинган.

Эслатиб ўтамиз, «Пахтакор» футболчиси ЖЧ—2022 саралаши доирасида ўтказилган Сингапурга қарши ўйинда (5:0) ўнг оёқ тизза қисмидан жароҳат олиб, майдонни эрта тарк этганди. Шунингдек, ушбу беллашувда Ҳусниддин Алиқулов ва Одил Аҳмедов ҳам турли даражадаги жароҳатлар олган.

Вадим Абрамов шогирдлари 11 июнь, жума куни Яманга қарши баҳс юритади. Учрашув Тошкент вақти билан 23:00 да бошланади.