Ўзаро ўйинларда ғалаба қозонмаган Туркия енгилмас Италияга қарши. Узоқ кутилган Евро—2020 мусобақаси бугун бошланади (превью)

Евро—2020 мусобақасининг дастлабки ўйини Рим шаҳрида бўлиб ўтади. А гуруҳи вакиллари — Туркия ва Италия ўзаро баҳс олиб боради. Қуйида мазкур учрашувга оид маълумотлар ва қизиқарли фактлар тақдим этилади.

Туркия Евро—2020 нинг кашфиёти бўладими?

«Қотил-машина», «мусобақа кашфиёти». Шу ва шунга ўхшаш номлар ҳар бир мусобақада терма жамоаларга тамға сифатида ёпиштирилади. Охирги санаганимиз эса Туркия терма жамоасига мос келади. Ушбу терма жамоа футболчилари Европанинг етакчи жамоаларида тўп суради. Жумладан, Юсуф Язижи, Зеки Челик, Бурак Йилмаз «Лилль» сафида Франция чемпионлигини қўлга киритди.

Италияга қарши баҳс ҳақида нима дейиш мумкин? Туркия терма жамоасининг мураббийи Шенол Гюнеш тактик жиҳатдан кучли мураббийлар сирасига киради. Бу ўйин А гуруҳи етакчиси бўлишга асосий даъвогарни аниқлаб беришини ҳисобга олсак, Гюнеш Италияга қарши жиддий тайёргарлик кўргани аниқ.

Туркия «иккинчи рақам» остида яхши ҳаракат қилади. Нидерландияга қарши мундиал саралаш ўйинидаги ғалаба шу тарзда қўлга киритилди. Норвегияга қарши баҳсда ҳам Туркия «иккинчи рақамли жамоа» бўлиб ҳаракат қилди. Иккала ўйинда ҳам Туркия ўйин бошида гол уриб олган ва қолган вақтда қарши ҳужумларга таяниб ҳаракат қилган.

Италия. Ўз уйингда деворлар ҳам ёрдам берадими?

Римда жойлашган «Олимпико» стадионига 17,5 минг мухлис ташриф буюришига рухсат бор. Италия терма жамоасини ўз уйида қўллаб-қувватловчи мухлислар йиғилади. Туркия ушбу ўйинда номинал мезбон сифатида ҳаракат қилса ҳам, ўйин Римда бўлиб ўтаётганини ҳисобга олсак, Италия ўзини ҳақиқий мезбон сифатида ҳис қилади.

Италия саралаш босқичини 100 фоизлик натижа билан якунлаганини унутмаслик керак. Манчини шогирдлари охирги марта 2018 йил октябрь ойида Миллатлар Лигаси ярим финалида Португалияга мағлуб бўлганди. Шундан буён итальянлар бирорта ўйинда мағлубият нималигини билмай келяпти.

Ўзаро ўйинлар тарихи

Туркия ва Италия шу пайтгача ўзаро 14 марта тўқнаш келган ва 10 та ўйинда Италия ғалаба қозонган 4 та дуранг қайд этилган. Туркия ҳали бирор маротаба ғалаба қозонмаган.

Ўзаро ўйинлар тарихидаги энг йирик ҳисоб 1964 йилги Олимпиада саралаши доирасидаги ўйинда қайд этилган. Итальянлар 7:0 ҳисобида рақибидан устун келган.

Жамоалар ўртасидаги энг охирги ўйин 2006 йил 15 ноябрда бўлиб ўтган. Италия ва Туркия ўртасида бўлиб ўтган ушбу баҳсда 1:1 ҳисоби қайд этилган.

Мураббийларнинг ўйин олди фикрлари

Ўйин техник, тактик ва физик жиҳатдан юқори даражада бўлади, деб ўйлайман. Биз эҳтиёт бўлишимиз керак. Акс ҳолда Италия ўйинни қандай боришини назорат қилади. Бир лаҳза ҳам диққатни чалғитмаслигимиз зарур. Жуда қийин гуруҳга тушган бўлсак ҳам плей-офф босқичига чиқиш бизнинг асосий вазифамиз. Ўйлайманки, Евро—2020 финалида Италияга қарши баҳс олиб борамиз.Шенол Гюнеш, Туркия терма жамоаси бош мураббийи

Ҳозирча асосий таркиб бўйича якуний қарорга келганим йўқ. Ўрганиб чиқиш керак бўлган нарсалар бор, лекин барча футболчиларнинг диққати жамланган.Туркия терма жамоасига ҳурмат билан муомала қилишимиз лозим. Туркия иқтидорли футболчиларга бой жамоа. Очилиш ўйинлари доим қийин кечади. Мухлисларга қувонч бағишлайдиган ўйин кўрсатиш керак. Бу бизнинг асосий мақсадимиз. Бор кучимиз билан ҳаракат қиламиз. Барча ўйлардан халос бўлган ҳолда, диққатни ўйинга қаратишимиз керак.

Роберто Манчини, Италия терма жамоаси бош мураббийи

Тахминий таркиблар:

Туркия: Уғуржан Чақир; Зеки Челик, Мерих Демирал, Чағлар Сўюнжю, Умут Мераш; Окай Ёкушлу, Озан Туфан, Хоқон Чалхонўғлу, Юсуф Язижи; Кенан Караман, Бурак Йилмаз.

Италия: Жанлуижи Доннарумма; Алессандро Флоренци, Леонардо Бонуччи, Жоржио Кьеллини, Леонардо Спинаццола; Николо Барелла, Жоржиньо, Мануэль Локателли; Доменико Берарди, Чиро Иммобиле, Лоренцо Инсинье.