«Уэмбли»дан «Паркен»гача. Евро—2020 ўйинлари қайси стадионларда ўтказилади?

2021 йилга кўчирилган Евро—2020 мусобақаси бошланишига 1 кун вақт қолди. Мусобақа 11 июнь, жума куни Туркия—Италия учрашуви билан очиб берилади. «Дарё» қуйида Европа чемпионати баҳсларига мезбонлик қиладиган стадионлар ҳақида батафсил маълумот беради.

«Уэмбли», Лондон

«Уэмбли» — мусобақанинг асосий стадиони. Бу ерда финал ва ярим финалдан ташқари яна 8 та ўйин бўлиб ўтади. Буюк Британия ҳукумати май ойининг ўрталарида стадионга 10 минг мухлис кириши мумкинлигини айтган эди, май ойининг охирида эса Англия Кубоги финалида «Уэмбли»га 20 минг мухлис ташриф буюрди.

Англия футбол федерацияси УЕФАга гуруҳ босқичи ўйинларига стадион сиғимининг чорак қисмига мухлислар киришига рухсат берилишини, ҳал қилувчи ўйинларда эса 50% мухлисга рухсат берилишини хабар қилди.

«Ҳемпден Парк», Глазго

Коронавирус пандемияси хавфига қарамасдан 7 апрель куни Шотландия расмийлари «Ҳемпден Парк»ка киришга 12 минг мухлисга рухсат берилишини эълон қилди. Бу стадионнинг 25% қисми тўлади дегани. Шубҳаларга ўрин қолмади — ўйинлар Англияга кўчирилмайди (фавқулодда вазиятлар юз бермаса).

«Йоҳан Кройфф Арена», Амстердам

Нидерландия футболи расмийлари 13 минг мухлис Евро ўйинларини Амстердам стадионидан кузатиш имконига эга бўлишини тасдиқлади. Бу қарор яна кўриб чиқиляпти ва якунда бу кўтсаткич яна 5 мингга ошиши мумкин.

«Миллий стадион», Бухарест

Руминияликлар Евро—2020 ўйинларига 13 минг мухлисни киришига рухсат берди. Бу стадионнинг чорак қисми. Ушбу стадонда тажриба мақсадида ўйинлар ўтказилди. Баҳорда «Челси» ва «Атлетико»нинг Чемпионлар Лигаси плей-офф ўйинлари шу стадионда бўлиб ўтди.

«Биз йирик спорт мусобақасининг бир қисмига айланиб, ташкилотчилик ва хавфсизлик борасида талабларга жавоб бера олишимизни бутун дунёга кўрсатиб қўймоқчимиз», — деди Руминия спорт вазири Эдуард Новак.

«Паркен», Копенгаген

Март ойининг охирида Дания ҳукумати Евро—2020 мусобақасига стадионнинг 30% қисми тўлишига рухсат беришини маълум қилди. УЕФАнинг расмий хабарига кўра, стадионнинг 25-33% қисмига мухлислар кириши тасдиқланган.

Дания маданият вазири: «Агар имкони бўлса, биз кўпроқ мухлисни стадионга киритамиз. Агарда вирус эпидемиясининг янги тўлқини бошланса, биз ўйинларни мухлисларсиз ўтказишга мажбурмиз. Бундай вазиятда мухлисларни стадионга киритиш мумкин эмас», — деб айтиб ўтди.

«Санкт-Петербург», Санкт-Петербург

Россияда 7 та ўйин ўтказилади: гуруҳ босқичининг 6 та ва чорак финал 1 та ўйини. Аввалига 4 та ўйин ўтказилиши кўзда тутилганди. Аммо Ирландиянинг потйтахти Дублин рад жавобини бергач, ўйинлар Петербургга кўчирилди.

Ташкилий қўмита раҳбари Алексей Сорокин ўйинлар минимал чекловлар билан ўтказилишини айтиб ўтди.

«Европа чемпионатига оптимизм билан қараяпмиз. Биз стадионнинг 50 фоизини тўлдириш бўйича келишувга эришганмиз. Чет этлдан келган мухлисларни ҳам киритишга рухсат олиш бўйича иш олиб боряпмиз. Россиядаги ўйинлар минимал чекловлар ва қоидаларга зид бўлмаган тарзда бўлиб ўтади, деб умид қиламиз», — деди Сорокин.

«Эстадио де ла Картуха», Севилья

Аввалига E гуруҳи ва Испания терма жамоасининг ўйинлари Бильбаода бўлиши айтилган эди. Лекин басклар мамлакати эпидемиологик хавфсизлик талабларига жавоб бермагани учун ўйинларни қабул қилиш ҳуқуқидан маҳрум бўлди. Барча ўйинлар Севильяга кўчирилди. Бу вариантни Испания футбол федерациясининг ўзи таклиф қилди. 60 минг мухлис сиғадиган стадионга 20 мингга яқин мухлис ташриф буюришига рухсат берилди.

Испания терма жамоаси бу қарордан хурсанд: Севильяда басклар мамлакатидан кўра қўллаб-қувватлайдиган мухлислар кўп бўлади. Бильбаоликлар Испания терма жамоаси учун унчалик жон куйдиришмайди.

«Альянц Арена», Мюнхен

Ташкилий қўмита хабарига кўра Мюнхендаги асосий стадионга эпидемиологик вазиятга қараб 14,5 минг мухлис (20%) киритилиши мумкин.

«Пушкаш Арена», Будапешт

Барча трибуналарини очадиган ягона стадион. «Пушкаш Арена» ҳозирча стадионда мухлислар сонига чеклов қўймаяпти.

«Биз эпидемиологик вазиятга қараб стадионга мухлисларни киритмоқчимиз. Лекин хавфсизлик талабларига юқори даражада масъулиятни ҳис қилган ҳолда ёндашамиз», — деб айтиб ўтди Венгрия футбол ассоциацияси вакили.

«Олимпия стадиони», Баку

Озарбайжон ҳукумати стадионнинг 50% қисмига (34 минг мухлис) рухсат бера олишини маълум қилди.

«Олимпия стадиони»да юқори даражадаги терма жамоалар ўйинлари ўтиши кўзда тутилмаган. Фақатгина Туркия терма жамоасининг ўша стадионга ташрифи катта қизиқиш уйғотиши мумкин.

«Стадио Олимпико», Рим

Айнан Италия пойтахтида Евро—2020 нинг дастлабки ўйини бўлиб ўтади. УЕФА маълумотига кўра стадионга 17,6 минг мухлис киришига рухсат бор.