Boeing компаниясининг учувчисиз учар қурилмаси ҳавода АҚШ ҳарбий денгиз кучлари қирувчисига ёнилғи қуйди. Бу ҳавода дрон ёрдамида самолётга ёнилғи ўтказиш бўйича амалга оширилган тарихдаги биринчи муваффақиятли амалиёт, деб ёзади Meduza.
Хабарга кўра, 4 июнь куни бўлиб ўтган синовлар давомида МQ-25 дронининг синов модели F/А-18 қирувчиси бакларига ёнилғи қуйган. Ёнилғи қуйиш пайтида қирувчи самолёт дрондан етти метрга яқин узоқликда турган.
Boeing баёнотида айтилишича, МQ-25 дрони муваффақиятли ёнилғи қуйишдан олдин 25 та парвозни амалга оширган. Синовлар ҳали давом этади.
Boeing компанияси МQ-25 дронини Пентагон билан 805 миллион долларлик шартнома доирасида ишлаб чиқаради, у эса 2018 йилда тузилган эди. Шартномага кўра, АҚШ ҳарбий денгиз кучларига еттита ёнилғи қуядиган учувчисиз учар қурилма етказиб берилади.
The Seattle Times газетасининг ёзишича, дастлабки шартномага қарамай, ҳарбий денгиз кучлари 72 та дрон ишлаб чиқаришга 9,5 миллиард доллар сарфлашни режалаштирган. Дастлабки тўртта учувчисиз учар қурилма 2024 йилга қадар ишга туширилиши керак.
МQ-25 қурилмасининг аниқ хусусиятлари ҳали ошкор қилинмаган. Тахминларга кўра, дрон парвозлар давомийлигини узайтириш орқали қирувчилардан янада самарали фойдаланишга имкон беради. МQ-25 биринчи парвозини 2019 йил 19 сентябрда амалга оширган.
Аввалроқ Ливияда жанговар дрон биринчи марта одамга мустақил тарзда ҳужум қилгани ҳақида хабар берилганди.
Изоҳ (0)