Жанубий Африка Республикасининг Гаутенг провинциясида яшовчи Госиаме Тамара Ситоле исмли аёл бирйўла ўнта чақалоқни дунёга келтирди, деб ёзади «РБК» маҳаллий IOL нашрига таяниб.
37 ёшли аёлда ҳомиланинг саккизинчи ойида тулғоқ бошланди. Болалар орасида етти нафари ўғил, уч нафари қиздир. Аввалроқ шифокорлар аёлга саккиз эгизак туғилишини айтганди.
Ситоленинг турмуш ўртоғи нашрга маълум қилишича, аёли унга УТТ (ультратовушли текширув) натижаларини кўрсатганида, бунга ишонолмаган. Бу тиббий нуқтаи назардан имконсиз деб ҳисоблаган.
Ҳозирча рекорд расман қайд этилгани йўқ. Айни пайтда бир вақтда энг кўп фарзанд кўриш бўйича рекорд америкалик аёлга тегишли. 2009 йил январида Надя Сулаймон Калифорниядаги касалхонада саккиз бола — олти ўғил ва икки қизни дунёга келтирган эди.
Эслатиб ўтамиз, май ойининг бошида Африканинг Мали давлатида яшовчи аёл бирйўла тўққизта фарзанд дунёга келтирган эди.
2020 йилнинг май ойида Францияда 30 йил ичида илк бора олти эгизак: беш қиз ва бир нафар ўғил бола дунёга келган эди. Ундан аввал Польшада биринчи марта олти эгизак дунёга келган. Эгизаклар — тўрт қиз ва икки ўғил 20 май куни Краков университети касалхонасида туғилганди.
Изоҳ (0)