Россия президенти Владимир Путин ва АҚШ президенти Жо Байденнинг юзма-юз учрашуви Женевадаги La Grange вилласида ёки Hôtel Résidence Parc des Eaux Vives меҳмонхонасида бўлиб ўтиши мумкин. Бу ҳақда NZZ am Sonntag нашрига таяниб, «РБК» хабар берди.

Фото: «РИА Новости»

Нашрнинг ёзишича, ушбу даражадаги учрашувни белгилайдиган бир қатор омиллар мавжуд бўлиб, унга кўлга қараган Швейцария вилласи жуда мос келади.

NZZ am Sonntag 1985 йилда Совет ва Америка раҳбарлари Михаил Горбачёв ва Рональд Рейганнинг учрашувини эслатиб ўтди. Ўшанда давлатлар раҳбарлари Женева ташқарисидаги Версуа коммунасида жойлашган Fleur d’Eau вилласида музокара ўтказган эди.

Нашр фотомухбирининг аниқлик киритишича, Швейцариянинг яна бир вилласи La Grange’да «ҳарбий этик кийган одамлар» бинони кўздан кечираётгани кўринган ҳамда вилла ва меҳмонхона жойлашган парк бир неча кун хавфсизлик ходимлари билан тўлдирилган.

Президентлар учрашиши мумкин бўлган яна бир жой ўша паркда жойлашган Hôtel Résidence Parc des Eaux Vives меҳмонхонаси.

Таъкидланишича, саммит давомида Женеванинг бутун маркази ёпилиши керак. Нашрнинг таъкидлашича, энг машҳур беш юлдузли бешта меҳмонхонанинг учтасида 15 июндан 16 июнга ўтар кечаси барча хоналар банд қилинган. Швейцария ташқи ишлар вазирлиги бу масала бўйича изоҳ беришдан бош тортди.

Швейцария ОАВ хабар беришича, Швейцария ҳукумати Байден ва Путиннинг саммити чоғида Женева устидан самолётларнинг ҳаво ҳудудига киришини чеклаш чораларини ишлаб чиқмоқда.

ОАВ маълумотларига кўра, чекловлар катта аҳамиятга эга.

Ҳаво майдонига киришни чеклаш схемаси Швейцария фуқаро авиацияси федерал бошқармаси томонидан Швейцария ҳаво кучлари, бир қатор федерал хизматлар ва ҳаво ҳаракатини бошқариш хизмати билан биргаликда ишлаб чиқилмоқда.

Бундан ташқари, хавфсизлик бўйича мутахассислар яқинда Женева кўли бўйидаги «О-Вив» пляжига ҳаво ҳужумига қарши мудофаа компонентларини ўрнатиш зарурати бор ёки йўқлигини текшириб чиққан.

Швейцария расмийлари келаси ҳафта саммит давомида Женевада хавфсизликни таъминлашда мамлакат қуролли кучларининг иштироки тўғрисида қарор қабул қилиши кутилмоқда. Ўз навбатида, Женева кантон полицияси ушбу тадбир давомида бир нечта зирҳли машиналарни ижарага олишга қарор қилган.

Украина президенти Владимир Зеленский Байден билан унинг Путин билан саммитидан олдин учрашишга тайёрлигини билдирди. Шу билан бирга Зеленский Байденнинг тиғиз жадвали туфайли буни амалга оширишнинг иложи йўқлигини тушуниб турибди.

«Ишончим комилки, у ёки бу шаклда мулоқот қилиш мумкин», — деди Зеленский. Украина раҳбари якуний қарорни америкалик ҳамкасбига қолдирди.

Аввалроқ Донбассдаги можарони ҳал қилиш бўйича уч томонлама алоқа гуруҳидаги Киев делегацияси раҳбари Леонид Кравчук Байденга Зеленский билан ҳеч бўлмаганда телефон орқали суҳбатлашишни таклиф қилиб, бу Байденнинг Россия раҳбари билан суҳбатида асқатиши мумкинлигини айтганди. Киев аллақачон Россия ва АҚШ саммитидан олдин Украина президенти Байденга қўнғироқ қилиш ниятида эканини маълум қилган.

Эслатиб ўтамиз, 13 апрель куни АҚШ президенти Жо Байден россиялик ҳамкасби билан учинчи давлат ҳудудида учрашиш истаги борлигини айтган эди. Кремль саммитнинг Евроиттифоқ давлатларидан бирида бўлиб ўтиши мумкинлигини маълум қилди. 4 май куни Байден учрашувнинг июнь ойида бўлиб ўтишини «умид билан кутаётгани»ни айтди. Кейинчалик Кремль раҳбарларнинг учрашуви 16 июнь куни Швейцариянинг Женева шаҳрида бўлиб ўтишини тасдиқлади.

Аввалроқ АҚШ ва Россия Путин ва Байденнинг учрашувидан нималар кутаётганини маълум қилган эди.