Фарғона вилоятида божхона бошқармаси ходимлари томонидан ўтказилган тезкор тадбирда 144 миллион сўмлик тамаки маҳсулотларининг ноқонуний айланмасига чек қўйилди. Бу ҳақда «Дарё»га вилоят божхона бошқармаси ахборот хизмати хабар берди.
Маълум қилинишича, Фарғона вилоят божхона бошқармаси Контрабандага қарши курашиш ва божхона аудити бўлими ходимлари томонидан Фарғона тумани ҳудудида тезкор тадбирлар ўтказилган.
Тезкор тадбир давомида фуқаро М.О.нинг яшаш хонадони холислар иштирокида ўрнатилган тартибда кўздан кечирилган. Натижада хонадон ҳовлисида хорижда ишлаб чиқарилган ҳамда божхона расмийлаштирувидан ўтказилганини тасдиқловчи ҳужжатлари бўлмаган, умумий қиймати қарийб 144 миллион сўмлик икки турдаги 12 минг 790 қути тамаки маҳсулотлари борлиги аниқланган.
Мазкур ҳолат юзасидан божхона органлари томонидан терговга қадар текширув ҳаракатлари олиб борилмоқда.
Изоҳ (0)