Тошкент туманида 19 ёшли йигит трансформатор токи уриши оқибатида вафот этгани тўғрисида хабар берилганди. Ҳозирда ушбу вазият жиддий ўрганилмоқда ва ушбу ҳолат тегишли мутасадди ходимлар назоратига олинган, дея хабар бермоқда «Ҳудудий электр тармоқлари» акционерлик жамияти.
Ўрганишлар давомида аниқланишича, мазкур бахтсиз ҳодиса 2021 йилнинг 6 май куни соат 11:00 атрофида Тошкент вилоятининг Тошкент тумани, «Чувалачи» МФЙда содир бўлган. Гуляшнар кўчаси, 110-уй манзилида яшовчи 2002 йилда таваллуд топган Х.Т. юқорида қайд этилган вақтда 110/35/10 киловатт «Кенсой» подстанциясидан чиқувчи 10 киловатт кучланишли фидер «Нажмиддин»га уланган ГКТП русумли 231-сонли трансформатор пункти ёнидаги темир панжарани ушлаши оқибатида воқеа жойида вафот этган.
Мазкур ҳолат бўйича Тошкент туман прокуратураси томонидан 2021 йил 24 май санаси билан 15/110-2021 сонли хизмат текшируви ўтказиш бўйича «Тошкент ҲЭТК»га сўровнома юборилган бўлиб, «Тошкент ҲЭТК»нинг 2021 йил 31 майдаги 207-сон буйруғи асосида ички текширув комиссияси ташкил этилган.
Ҳозирда мазкур ҳолат бўйича Жиноят кодексининг 207-моддаси (мансабга совуққонлик билан қараш) билан жиноят иши қўзғатилган бўлиб, дастлабки тергов ҳаракатлари олиб борилмоқда.
«Шу ўринда ушбу бахтсиз ҳодиса содир бўлган вақтдан қарийб бир ой ўтиб ижтимоий тармоқларда тарқалган мазкур видеолавҳа ҳақиқийлиги, яъни у айнан шу ерда фаолият олиб бораётган дўкон камерасига гўёки муҳрлангани, бироқ камера дўконга эмас, айнан воқеа содир бўлган жойга қаратилгани, бундан ташқари камера объективида сана, вақт акс этмаётгани каби қатор саволларни туғдирмоқда.
Суриштирув жараёнлари давом этаётган пайтда жамоатчиликдан якуний хулоса чиқармасликларини, шу билан бирга электр энергияси муҳофаза ҳудудлари, кучланиш мавжуд жойларда эҳтиёткор бўлишларини, носоз электр қурилмаларига дуч келган ҳолда эса дарҳол 1154 қисқа рақами орқали «Ҳудудий электр тармоқлари»нинг Call-марказига ёки Telegram мессенжеридаги ‘Ҳудудий электр тармоқлари’ АЖ билан мулоқот» канал администраторига (@HET_admin) мурожаат қилишларини сўраб қоламиз.
Шунингдек, бундай ҳолларда электр таъминоти корхоналарининг диспетчерлик хизматларига хабар бериш мақсадга мувофиқлиги ҳамда мавжуд электр узатиш тармоқлари ва ускуналарнинг кучланиш остида бўлган ток ўтказувчи қисмларга мумкин бўлмаган масофага яқинлашмаслик кераклигини яна бир бор эслатиб ўтамиз», – дейилади хабарда.
Бундан аввал Тошкентда поезд устида селфи қилмоқчи бўлган 18 ёшли йигитни 27 минг волтли ток ургани ҳамда Тошкентда 8 ёшли қизалоқ электр токи уриши оқибатида вафот этгани ҳақида хабар берилганди.
Изоҳ (0)