«Auto.ru» сайтида 1956 йилда ишлаб чиқарилган қора «ГАЗ-12 ЗИМ» сотувга қўйилгани тўғрисида эълон пайдо бўлди. Партия номенклатураси автопарки таркибига кирган совет седани жуда яхши ҳолатда сақланган. 90 от кучига эга двигатель ўрнатилган ва ҳозирга қадар 60 минг километр йўл босган ноёб автомобилни 7,7 миллион рублга (105 минг доллар) сотиш режалаштирилмоқда, деб хабар беради Motor.
«ГАЗ-12 ЗИМ» биринчи бор 1950 йилда тақдим этилган бўлиб, Горкий заводининг биринчи сериялик ҳукумат автомобилига айланган. Модель машҳур «ГАЗ-13» («Чайка») нинг давомчиси ҳисобланади ва у тезда СИКП МҚ партия номенклатурасининг автомобиллар таркибидан ўрин олган. Конструкторлар эҳтиёт қисмларнинг қарийб ярмини, трансмиссия ва юриш қисмини «ГАЗ-51» ва «ГАЗ-20»дан олган. «ГАЗ-12» базасида стандарт седандан ташқари бир неча очиқ кузовли фаэтонлар ҳам яратилган. Бироқ кейинги бир нечта тажриба намуналари ўзини оқламаган, чунки томи олиб ташланган кузов етарлича мустаҳкам бўлмаган.
Орқа узатмали «ГАЗ-12 ЗИМ» 90 от кучига эга 3,5 литрли бензин двигатель ёрдамида ҳаракатга келади. Модель учун махсус янги уч поғонали механик узатмалар қутиши ишлаб чиқилган.
Сотувчининг сўзларига кўра, автомобиль узоқ йиллардан буён хусусий коллекцияда сақланиб келмоқда, шу сабабли унинг ташқи кўриниши ва техник жиҳати идеал ҳолатда.
Аввалроқ Германияда 40 йил гаражда сақланган «ГАЗ» лимузини 25 минг еврога сотилаётгани тўғрисида хабар берилганди.
Изоҳ (0)