YouTube’даги Gotcha Cars каналида бешинчи авлод Kia Sportage’нинг компания томонидан эълон қилинган расмий тизерлар ҳамда реал автомобилнинг жосуслик суратлари асосида яратилган сифатли рендерлари эълон қилинди, деб хабар беради IXBT.
Gotcha Cars канали янги ва эски авлод Kia Sportage’ларни ўзаро таққослаган, шунингдек, автомобиль Hyundai Tucson, Volkswagen Tiguan ва Nissan Qashqai олдида қандай кўринишини намойиш этган.
Янги Kia Sportage’нинг ташқи кўриниши ростдан ҳам ноёб — бунга ҳеч қандай шубҳа йўқ. Аммо янги ихчам кроссовернинг техник жиҳати Hyundai Tucson’га жуда ўхшаш.
Аввалроқ янги Kia Sportage кроссовери Европада бироз кечикиш билан сотувга чиқиши ва АҚШ ҳамда Жанубий Корея бозорлари учун мўлжалланган версиялардан калтароқ бўлиши маълум қилинганди. Бу борада ҳам янги модель Hyundai Tucson’га ўхшаб кетади.
Тахминларга кўра, янги Sportage бозор шароитидан келиб чиқиб, турли двигателларга эга бўлади. Европада 1,6 ва 2 литрли дизель двигателга эга версиялари, шунингдек, 1,6 литрли бензинда ҳаракатланувчи гибрид версиялар сотувга чиқади.
Бешинчи авлод Kia Sportage Жанубий Корея ва АҚШда июль ойида, Европада эса сентябрда сотувга чиқиши кутилмоқда. Ҳозирга қадар Sportage дунёда энг кўп сотилган кроссовер ва Kia’нинг энг машҳур автомобили бўлиб қолмоқда.
Аввалроқ Kia биринчи бор ўзининг янги электрокари тизерини намойиш этгани, компания ўзининг логотипи ва шиорини ўзгартиргани тўғрисида хабар берилганди.
Изоҳ (0)