«Аҳолининг даромади паст». Маркетолог Ўзбекистонга йирик брендлар кириб келмаётганининг сабаблари ҳақида гапирди

Ўзбекистон иқтисодиётининг лозим даражада ривожланмаётгани мамлакатга йирик брендларнинг кириб келишига тўсқинлик қилаётган сабаблардан биридир. Бу ҳақда маркетолог Шоҳрух Низомитдинов YouTube’даги «Улар» лойиҳасига берган интервьюсида айтиб ўтди.

Валюта конвертациясининг эркинлаштирилгани, мамлакат ҳаётининг деярли ҳар бир жабҳасида эркинлик ва очиқлик сиёсати олиб борилаётганига қарамай, жаҳон брендларининг Ўзбекистонга кириб келиши секин кечмоқда. Маркетологнинг фикрича, брендлар кириб келиши учун иқтисодиётни ривожлантириш лозим, иқтисодчилар Ўзбекистонни иқтисодий ривожлантириш моделини ўйлаб топишлари керак.

«Энг катта тўсиқ — макроиқтисодиётнинг ривожланмаётгани. Иқтисодчиларимиз Ўзбекистоннинг иқтисодий моделини ўйлаб топишлари керак — Ўзбекистоннинг қандай кучли тарафлари борлигин, шу кучли тарафларни бозорда қандай ишлата олишимиз мумкинлигини аниқлаш муҳим. Қолаверса, аҳоли даромадининг пастлиги ҳам бунга таъсир кўрсатади. Мисол учун, Зара каби йирик кийим брендлари аҳоли даромадига қарайди. Бизда эса аҳоли даромади унча юқори эмас. Шунингдек, маҳаллий бозорнинг ўзида ҳам ўсиш бўлиши керак», — деди у.

Суҳбат давомида Шоҳрух Низомутдинов йирик брендларнинг мамлакатга кириб келиши муаммосидан ташқари мамлакатнинг ўз брендини яратиш масаласи борлигини ҳам қайд этиб ўтди.

«Маркетингда миллат брендинги ёки давлатлар брендинги деган тушунча бор. Ҳар бир давлат ўз маркетинги ҳақида ҳам ўйлаши керак. Ўзбекистоннинг юзини дунёда бренд шаклида қандай қилиб яратишимиз мумкин? Мисол учун, туризм ривожланиши учун Ўзбекистонни брендлаштириш керак. Маҳсулотни бозорда юритиш ва давлатни дунё миқёсда юритиш принциплари бир хил», — деди у.

«Давлатда ҳам истеъмолчилар бор, масалан, туристлар. Таътил арафасида қаерга бориш ҳақида ўйлаётган туристларнинг икки-уч мамлакатдан иборат танловида Ўзбекистон бўлиши учун ҳам мамлакат брендлаштирилиши муҳим. Шундан кейингина мақсадли аудитория ўрганилади. Чунки мақсадли аудиториянинг ўз иштиёқлари, менталитети бор. Уларнинг хоҳишига қараб иш тутилади», — дея қўшимча қилди Шоҳрух Низомутдинов.

Маълумот учун, 2017 йил сентябрида ўша вақтда ташқи савдо вазири лавозимида ишлаган Элёр Ғаниев АҚШнинг McDonald’s корпорацияси Ўзбекистон бозорига киришга қизиқиш билдираётгани ва бу борадаги имкониятларни ўрганаётганини маълум қилган эди. Кейинроқ, Ўзбекистон ҳукуматининг 2018 йил май ойидаги қарорида 2019 йил январига қадар «Чорвоқ» эркин туристик зонасида McDonald’s, Starbucks, Burger King ва KFC каби халқаро брендлар тармоқларини яратиш масалалари кўриб чиқиш бўйича топшириқ берилган эди. Шу вақтгача Ўзбекистонда фақат KFC тармоғи ўз фаолиятини бошлади.