Кунлар исишни бошлаши билан кўпчилик қулай кийиниш учун трендларга риоя қилмасликни ёки замонавий бўламан деб ноқулай кийиниш услубини танлаши мумкин. Бирини қилиш учун иккинчисидан воз кечиш шарт эмас, олтин оралиқни топиш — ҳам ўзига хос, ҳам ҳавога мос кийиниш мумкин.
Оч рангли кийимлар
Фото: Marie Claire
Оч ранглар жазирамада одамни бўғиб қўймайди. Тўқ ранглар иссиқликни ўзига тортади, оч ранглар эса аксинча. Бошқа ранглар билан мослаш осонлиги ва кўринишга нафислик бахш этиб тургани сабаб ҳам ёз кунлари оч матодан тикилган, ёпишиб турмайдиган бичимдаги либос ва кийимларни кийиш тавсия қилинади.
Бошдан оёқ оқ кийиниш
Фото: Marie Claire
Қишда бошдан оёқ тўқ рангда кийиниш тавсия қилинган бўлса, ёзда эса аксинча иложи бўлса, кийимлардан ташқари аксессуарларнинг ҳам оқ рангда бўлиши мақсадга мувофиқ ҳисобланади. Аммо танлов борасида кийимнинг оқлик даражаси бир-биридан яққол фарқ қилмаслигига эътибор қаратиш керак. Оч оқ кийиндингизми кофта, юбка ёки сумкангиз қаймоқ ранг бўлмасин.
Кенг, аммо ўзига хос бичим
Фото: Marie Claire
Ўзига хос бичимли, ипак матосидан тикилган кенг топ нафислиги билан нафақат ўзингиз, балки атрофдагиларнинг ҳам кайфияти кўтарилишига ҳисса қўшади.
Аксессуарлар
Фото: Marie Claire
Ёзда қишдаги сингари қават-қават кийиниб бўлмаслиги мумкин, аммо образ ўзига хос бўлиши учун аксессуарларни канда қилмаслик керак. Янгилик қилишдан, турли занжир, билакузук, узукларни бирга тақишдан қўрқманг. Сумкани дидингизга қараб алмаштиринг.
Фото: Marie Claire
Ипак матодан тикилган рўмолдан ҳар сафар фойдаланинг: бир сафар билагингизга, кейинги гал бошингизга ўранг, шунингдек, сумка четига ҳам боғласангиз бўлади. Қолаверса, қуёшдан ҳимоя қиладиган кўзойнак тақишни унутманг. Макияж ва соч турмаклашга вақтингиз бўлмаса, ушбу аксессуар сизни қутқариши мумкин.
Пойабзалга урғу беринг
Фото: Marie Claire
Ёрқин ва ўзига хос пойабзаллар ёз учун айни муддао. Пошна ёки текис вариантларга эътибор қаратиш хоҳишингизга ҳавола. Оёқларингиз шишмаслиги учун эса сал каттароқ пойабзал олиш тавсия қилинади.
