Остон Ўрунов янги мавсумга тайёргарликни қайси жамоада бошлаши маълум бўлди

«Спартак» ярим ҳимоячиси Остон Ўрунов яқин орада жароҳатидан фориғ бўлиб, янги мавсумга тайёргарликни бошлайди.

«РБ Спорт» нашрининг хабарига кўра 20 ёшли ўзбекистонлик футболчи машғулотларни Москва клубининг асосий таркиби билан эмас, балки иккинчи жамоа сафида бошлайди.

«Спартак-2» («Спартак»нинг иккинчи жамоаси) Россия чемпионатининг қуйи дивизионида ҳаракат қилади. Биринчилик 10 июль санасида бошланади.

Қайд этиш жоиз, Ўрунов жароҳати сабаб Ўзбекистон терма жамоасининг Жаҳон Чемпионати саралаш босқичи доирасидаги ўйинларни ўтказиб юбормоқда.

Ўрунов 2020 йилнинг август ойида 1 миллион евро эвазига «Уфа»дан «Спартак»ка ўтганди. Аммо у пойтахт клубида мунтазам ўйин амалиётига эга бўлмади ва 2021 йилнинг февралида ижара асосида «Уфа»га қайтди.

Остон Россия чемпионатининг 2020/21 йилги мавсумида 16 та ўйинда майдонга тушиб, бирорта самарали ҳаракатни амалга оширмади.