«Аристократлар»нинг самовий харидлари: «Челси» чемпион таркибни йиғиш учун қанча маблағ сарфлаган?

Португалиянинг Порту шаҳрида 29 май куни «Челси» «Манчестер Сити»ни минимал ҳисобда мағлуб этиб (1:0), Чемпионлар Лигасидаги иккинчи совринини қўлга киритди. Иккала унвон ҳам клубнинг ҳозирги президенти Роман Абрамович даврида қўлга киритилди. 18 йил давомида россиялик миллиардер жамоаси учун талайгина пул сарфлаб қўйди. «Championat.com» нашри «Челси»нинг ҳозирги чемпион таркиби қанчага тушганини ҳисоблаб чиқди.

Қимматбаҳо трансферлар ва иқтидорли тарбияланувчилар

Чемпионлар Лигасининг 2020/21 йилги мавсумида «Челси» 27 нафар футболчини рўйхатдан ўтказди. Уларнинг барчаси қайдномага киритилиб келинди, фақатгина уч нафар футболчи майдонга тушмади. Булар: дарвозабон Вилли Кабальеро (2018 йилнинг ёзида эркин агент сифатида жамоага келган), Карло Жигер (2017 йилнинг ёзида «Челси» академиясига бошқа жамоадан ўтган) ва ҳозирда «Милан»да ижара асосида тўп сураётган Фикайо Томори.

2020 йилнинг ёзида Абрамович трансферлар учун самовий пуллардан воз кечди. Қуйидаги ўйинчилар харид қилинди:

• Эдуард Менди – «Ренн»дан 24 миллион евро эвазига;
• Бен Чилуэлл – «Лестер»дан 50 миллион евро эвазига;
• Кай Ҳаверц – «Байер»дан 80 миллион евро эвазига;
• Ҳаким Зиёш – «Аякс»дан 40 миллион евро эвазига;
• Тимо Вернер – «Лейпциг»дан 53 миллион евро эвазига.

«Челси»нинг Абрамович даврида амалга оширилган энг қиммат харидлари (ҳозирги таркибда борлари):

• Кепа – 80 млн евро («Атлетик»дан сотиб олинган);
• Кристиан Пулишич – 64 млн евро («Боруссия Д»);
• Жоржиньо – 57 млн евро («Наполи»);
• Матео Ковачич – 45 млн евро («Реал»);
• Антонио Рюдигер – 35 млн евро («Рома»);
• Нголо Канте – 35 млн евро («Лестер»);
• Маркос Алонсо – 23 млн евро («Фиорентина»);
• Эмерсон – 20 млн евро «Рома»;
• Оливье Жиру – 17 млн евро «Арсенал».

Шу билан бирга «Челси» тарбияланувчилари ҳам жамоанинг Чемпионлар Лигасидаги ғалабасига катта ҳисса қўшди. Бундай ўйинчилар қаторига Рис Жеймс, Андреас Кристенсен, Мэйсон Маунт, Каллум Ҳадсон-Одои ва Тэмми Абраҳамни киритиш мумкин. Жамоа сардори Сесар Аспиликуэта эса бир вақтлар клубга атиги 9 миллион евро тушган.

Юқоридаги рақамлар сарҳисоб қилинса, Абрамович бутун таркибни йиғиш учун 647 миллион евро сарфлаган. Ҳозирда эса Transfermarkt портали жамоанинг умумий қийматини 786,8 миллион еврога баҳоламоқда, яъни 140 миллион еврога кўпроқ.

Яна бир қизиқарли жиҳат, Томас Тухель ўзи шакллантирмаган таркиб билан ҳам Чемпионлар Лигасида ғалаба қозонишга муваффақ бўлди. Унинг талабига биноан Абрамович ҳали бирорта ҳам футболчини сотиб олгани йўқ. Тез орада ёзги трансфер ойнаси очилади, Тухель Абрамовичга янги футболчиларни буюртма қилиши аниқ. Бунга ҳаққи бор!