Сурхондарёда янги институт фаолияти йўлга қўйилади. Бу ҳақда айни пайтда Сурхондарё вилояти фаоллари билан ўтказилаётган йиғилишда Президент Шавкат Мирзиёев айтиб ўтди, дея хабар бермоқда «Дарё» мухбири.
«2021/2022-ўқув йилидан бошлаб математика, кимё-биология, информатика ва ахборот технологияларига ихтисослашган 14 та мактаб фаолияти йўлга қўйилади. 2021—2022 йилларда 12 та мактаб инглиз тили, 2 та мактаб немис тили, 1 та мактаб француз тилига ихтисослаштирилади.
Мусаев, Тошқулов икки ой муддатда Тошкент давлат техника университети Термиз филиали негизида ушбу университетнинг Термиз муҳандислик-технология институтини ташкил этиш қарори лойиҳасини киритсин», — деди давлат раҳбари.
Президент, шунингдек, 2021/2022-ўқув йилидан бошлаб ушбу янги институтда қурилиш ва геология соҳалари учун олий маълумотли мутахассислар тайёрлаш, институт қошида Бойсун туманида кўп тармоқли техникум ташкил этиб, кончилик, пиллачилик ва қурилиш материаллари ишлаб чиқариш соҳалари учун ўрта махсус маълумотли мутахассислар тайёрлаш йўлга қўйилишини айтди.
Эслатиб ўтамиз, 2021 йил 5 май куни ўтказилган видеоселектор йиғилишида давлат раҳбари чет тиллари бўйича юқори кўрсаткичларга эришган мактаблар учун Президент соврини таъсис этилишини айтганди. Шунингдек, таълим муассасалари битирувчилари камида 2 та чет тилини мукаммал билиши шартлигини таъкидлаганди. «Мамлакатимизда хорижий тилларни ўргатиш бўйича келажак учун мустаҳкам пойдевор бўладиган янги тизимни йўлга қўйиш вақти-соати келди», деган эди Президент.
Изоҳ (0)