Давлат раҳбари икки ой муддатда унумдорлиги паст бўлган ғалладан бўшайдиган майдонлардан томорқа ер эгаларига сабзавот-полиз маҳсулотлари етиштириш учун ўртача 15-20 сотихдан 10 йил муддатгача ижарага беришнинг ҳуқуқий асосларини ишлаб чиқиш бўйича кўрсатма берди.
«Вилоятда томорқадан самарали фойдаланиш бўйича хонадон эгаси – тайёрловчи корхона – қайта ишловчи ва экспортёрларни боғловчи тизим яратамиз», – деди Президент.
60 та секторнинг ҳар бирида томорқада маҳсулот етиштирувчи хонадонларни кластерлар билан боғловчи тайёрловчи корхоналар ташкил этилади.
Тайёрловчи корхоналар томорқа ер эгаларидан етиштирилган маҳсулотни сотиб олиб, саралаб, кластерларга экспорт қилиш ва қайта ишлаш учун беради.
Президент бош вазир ўринбосари Сардор Умурзоқовга кластерлар томонидан томорқада етиштирилган маҳсулотларни ташқи бозорларда сотишни ташкил этиш учун Россиядаги элчихона ва ваколатхоналарда Сурхондарё вилояти вакиллари фаолиятини йўлга қўйиш бўйича топшириқ берди.
Ушбу тизимни ташкил қилиш учун Тикланиш ва тараққиёт жамғармасидан 1 триллион сўм маблағ ажратилади.
Бундан аввал Шавкат Мирзиёев Сурхондарёда янги институт фаолияти йўлга қўйилишини маълум қилгани, Ҳаким ат-Термизий мақбарасини зиёрат қилгани ҳамда депутатларни фаолликка чақиргани ҳақида хабар берилганди.
Изоҳ (0)