«Korzinka.uz» супермаркетлар тармоғи асосчиси Зафар Ҳошимов коронавирусга қарши Pfizer/BioNTech вакцинасининг иккинчи дозаси билан эмланди. Бу ҳақда тадбиркор ўзининг Facebook’даги саҳифасига ёзиб қолдирган.
«Ота-онам Ўзбекистонда вакцина олди. Ёш ва касбий чекловлар сабаб хорижда эмланишга мажбур бўлдим», — деб ёзади тадбиркор Дубайда эмланганига ойдинлик киритиб.
Шунингдек, у бугунги кунда вакцинация ўзини ва яқинларини коронавирусдан ҳимоялашнинг энг хавфсиз усули эканлигини таъкидлаган.
«Барча дўстларим ва танишларимга мурожаат қиламан: ота-онангизни эмлатинг, ўзингиз ҳам эмлашнинг исталган имкониятидан фойдаланинг», — деб ёзади тадбиркор. Зафар Ҳошимов, шунингдек, конспирологларга эмас, балки инсониятнинг омон қолишига ёрдам берган илм-фанга ишонишни сўраган.
Аввалроқ Ўзбекистонда чет элга кетадиган талабалар ва ОАВ ходимлари 31 майдан коронавирусга қарши эмланиши, ўзбек-хитой вакцинаси билан эмланганларга 3-дозани қўллаш бошлангани тўғрисида хабар берилганди. Айни вақтда мамлакатда жами эмланганлар сони 1 379 190 кишини ташкил этмоқда.
Изоҳ (0)