Қашқадарё вилоятининг Шаҳрисабз шаҳрида ҳоким Акром Сулаймонов топшириғига кўра, жамоатчилик тартибини сақлаш баҳонасида ҳоким қабулига келган мурожаатчи аёл — Нодира Ўринованинг бир кун асаб-руҳий касалликлар шифохонасига тиқиб қўйилгани ҳақида хабар берилганди. Мазкур мақолага муносабат билдирган ҳокимлик ахборот хизмати вазиятни ўрганиб чиққан ишчи гуруҳ маълумотларига таяниб, мурожаатчи аёлни ношукур деб атади ва унинг шахсий ҳаётига доир ахборотларни жамоатчиликка ошкор қилди.
«2013 йилнинг 16 мартида Нодиранинг (Нодира Ўринова — таҳ.) акаси Райим, онаси Ўринова Аширойлар қизини шифохона шароитида ётқизиб даволатишда амалий ёрдам сўраб, мурожаат қилган. Мурожаат сабаби Ўринова Нодира мунтазам равишда уйдагилари билан жанжал қилиб, акаси Райимнинг фарзандини қудуққа ташламоқчи бўлган ва ўз жонига қасд қилишга уринган», — дейилади ҳокимлик ахборот хизматининг расмий Telegram-каналида.
«Нодира Ўринова 1997 йилдан бери асаб-руҳий касалликлар шифохонасида ... хасталиги билан рўйхатга олинган», — дея ёзади ҳокимлик ахборот хизмати. Нодира Ўринованинг қайси хасталикдан даволанаётганини ҳам ёзиб, ҳокимлик ахборот хизмати бемор ҳаётига доир сир сақланиши лозим бўлган маълумотни оммага ошкор қилган.
Ҳокимлик ахборот хизматининг ёзишича, шаҳар ҳокими Акром Сулаймонов мурожаатчи Нодира Ўринова ҳақида гапириб, у ҳар сафар қабулга кириб, қабул тартибини бузишга ҳаракат қилишини айтган.
«Видеомурожаатда Нодира Ўринова шу йилнинг 5 апрель куни Китоб туманидаги вилоят 2-сонли асаб-руҳий касалликлар диспансерига шаҳар ҳокимлиги томонидан мажбурий олиб келинганлигини билдирганди. Ҳоким қабулига келган Нодира Ўринова ҳар ой қабулга кириб, қабул тартибини бузишга ҳаракат қилганлигини айтди. Сўнгги марта ҳам худди шундай жараён юзага келган», — деб ёзади шаҳар ҳокимлиги ахборот хизмати.
Шаҳрисабз шаҳар ҳокимлиги ахборот хизмати Нодира Ўриновага 2018 йил ҳокимлик томонидан гилам, 2019 йил Маҳалла ва оилани қўллаб-қувватлаш бошқармаси томонидан кондиционер, 2020 йил эса ҳомийлар томонидан пул мукофоти берилганини маълум қилиб, «жамиятимизда бундай ношукур, норози инсонларнинг онг-у шуурига маънавият ва маърифат орқали таъсирчан чораларни амалга ошириш лозим деб ҳисоблаймиз», дея фикр билдиради.
Эслатиб ўтамиз, Нодира Ўринованинг асаб-руҳий касалликлар шифохонасига мажбурий тартибда олиб борилиб, бир кун ушлаб турилганини нафақат шаҳар ҳокими Акром Сулаймонов, «Дўстлик» маҳалласи раиси Фарруҳ Исканов ҳамда «участкавой» Зоҳид Амирқуловлар ҳам тасдиқлаганди. Шундай экан, Нодира Ўринова билан боғлиқ вазиятни ўрганиб чиққан ишчи гуруҳ унинг мажбурий тартибда шифохонага олиб борилиши ва бир кун ушлаб турилишига эътибор қаратиб, жавобгарлик масаласини ойдинлаштирувчи маълумотларни ҳуқуқни муҳофаза қилувчи ташкилотларга юборса, мақсадга мувофиқ бўларди.
Изоҳ (0)