2020 йилда Xiaomi компанияси 120 ваттли ўта тез қувватланиш функциясига эга Mi 10 Ultra флагманини тақдим этганди. У сиғими 4500 мА/соат бўлган аккумуляторни 23 дақиқа ичида тўлиқ қувватлантиришга қодир. Ишлаб чиқарувчи бу билан тўхтаб қолмасликка қарор қилди ва 200 ваттли HyperCharge қувватлантиргичини яратди, деб хабар беради Lifehacker.
Бу каби қувватда сиғими 4000 мА/соатга тенг аккумулятор 10 фоиз қувватни 44 сонияда, 50 фоизни уч дақиқада, 100 фоиз қувватни эса 8 дақиқа ичида олади. Таққослаш учун, Xiaomi’нинг энг яқин рақобатчилари Oppo ва Realme 125 ваттли қувватлантиргични тақдим этган.
Xiaomi ақл бовар қилмас даражадаги кучли симли қувватлантиргич билан бирга, 120 ваттли янги симсиз қувватлантиргични ҳам тақдим этган. Унинг ёрдамида 4000 мА/соатли аккумулятор 15 дақиқа ичида тўлади.
Иккала технология ҳам Mi 11 Pro флагманида намойиш этилган бўлиб, унинг стандарт версияси 67 ваттли қувватланиш функциясига эга. Қуввати 200 ва 120 ваттга тенг технология серияли ишлаб чиқариш жараёнида қўлланиш-қўлланмаслиги номаълум.
Аввалроқ Жанубий Кореянинг Сежон университети тадқиқот гуруҳи янги турдаги қувватлантиргич устида иш олиб бораётгани, у смартфонларни ҳаво орқали қувватлантира олиши ҳақида хабар берилганди.
Изоҳ (0)