АҚШда иккинчи Озодлик ҳайкали ўрнатилади

Франция 7 июнь куни АҚШга иккинчи Озодлик ҳайкалини юборади. Ушбу ҳайкал Америкада 10 йил давомида сақланади. Бу ҳақда Tengrinews хабар берди.

Маълумотларга кўра, у асл Озодлик ҳайкалининг кичик ҳажмдаги айнан нусхаси ҳисобланиб, XIX аср охирида Густав Эйфель томонидан яратилган. Франциядан келтириладиган Озодлик ҳайкали 2,83 метрни ташкил этади. Шу вақтгача ушбу ҳайкал Париж кўчаларидан бирини безаб турган.

Маълум қилинишича, ҳайкал Америкага 4 июль куни етиб келади ва Элис оролига, Миллий миграция музейи ҳудудига ўрнатилади ва 10 йил давомида ўша ерда туради.

Нашрнинг ёзишича, Франция Озодлик ҳайкалини иккинчи марта Атлантика океанининг нариги томонига юборади. Биринчи машҳур ҳайкал Америкага 1886 йилда юборилган. Франциянинг ушбу совғаси АҚШ Мустақиллик декларацияси қабул қилинганининг 100 йиллиги муносабати билан тақдим этилган. 135 йил ўтгач, Франция АҚШ билан ўзаро дўстлик белгиси сифатида АҚШга яна Озодлик ҳайкалини юборади.

Маълумот учун, Англиянинг жануби-шарқидаги Винчестер университети ҳудудида ҳам экофаол Грета Тунбергнинг ҳайкали ўрнатилди. Ҳайкални ўрнатиш учун таълим муассасаси 24 минг фунт стерлинг (тахминан, 33 минг доллар) сарфлади.

Аввалроқ Бразилиянинг жанубида жойлашган Энкантадо шаҳрида Исо Масиҳнинг янги ҳайкали ўрнатилиши ҳақида хабар берилди. У Рио-де-Жанейро шаҳридаги 38 метрлик машҳур Нажоткор Масиҳ ҳайкалидан баланд бўлади.

Россиянинг Санкт-Петербург шаҳридаги Петроград округидан ўтувчи Карповка дарёси бўйида COVID-19 пандемияси даврида вафот этган тиббиёт ходимларининг хотирасига бағишланган ёдгорлик очилди. Ушбу ҳайкалга «Ғамгин фаришта» номи берилди.