Sankt-Peterburgning Petrograd okrugidan o‘tuvchi Karpovka daryosi bo‘yida COVID-19 pandemiyasi davrida vafot etgan tibbiyot xodimlarining xotirasiga bag‘ishlangan yodgorlik ochildi. Bu haqda Meduza xabar berdi.

Foto: Sankt-Peterburg ma’muriyati

Bu yerga “G‘amgin farishta” deb nomlangan bronza haykal o‘rnatilgan. Asar muallifi Sankt-Peterburg fuqarosi, rassom Roman Shustrov bo‘lib, u 2020-yil 14-mayda koronavirus oqibatida vafot etgan. Yodgorlikning ochilish marosimida haykaltaroshning bevasi Mariya Kasyanenko, Petrograd okrugi rahbari Ivan Gromov va Sankt-Peterburg gubernatori Aleksandr Beglov ishtirok etdi.

2020-yil aprel oyida pandemiya avj olishi bilan Sankt-Peterburgdagi Malaya Sadovaya ko‘chasida, shahar sog‘liqni saqlash qo‘mitasi qarshisidagi devorga koronavirusdan vafot etgan shifokorlarning portretlari osilishi natijasida beixtiyor “Xotira devori” yodgorligi hosil bo‘lgan edi. Noyabr oyida devordan portretlar olib tashlangan, ammo o‘shanda rasmiylar yangi xotira yodgorligini ochishga va’da bergan.

Dastlab “G‘amgin farishta” yodgorligining ochilish marosimi 4-mart kuni bo‘lib o‘tishi xabar qilingan edi. Deputat Boris Vishnevskiyning aytishicha, 3-mart kunidagi marosim aslida yodgorlikni yaratish tashabbuskorlarisiz, gubernatorning o‘zi uni ochib berishi uchun maxfiy tarzda o‘tkazilgan. Uning so‘zlariga ko‘ra, haykaltaroshning bevasi bir kun oldin aldov yo‘li bilan marosimga taklif qilingan.

“Xotira devori” yodgorligining yaratuvchisi Irina Maslova marosim vaqtining to‘satdan o‘zgartirilishini “erkakcha ish emas”, deb atadi. “Shaharga mas’ul bo‘lgan amaldorning xatti-harakatlari nomuvofiqligi haqida biror izoh berolmayman. Ammo men prezidentga ushbu gubernator bizning shaharga loyiq emasligi to‘g‘risida murojaat yozaman va biz fuqarolarning ishonchini yo‘qotgani uchun uni lavozimidan chetlatishni so‘raymiz”, —  degan u “Fontanka” nashriga bergan izohida.

Eslatib o‘tamiz, AQSh poytaxti Vashingtonda 2020-yil 23-oktabr kuni rassom Syuzan Firstenberg tomonidan koronavirus pandemiyasi paytida odamlarning ommaviy ravishda halok bo‘lishiga bag‘ishlangan “Qanday qilib bu Amerikada sodir bo‘lishi mumkin...” deb nomlangan badiiy installyatsiya ochilgan. Installyatsiya koronavirus oqibatida vafot etgan amerikaliklarning o‘sha paytdagi soniga mos ravishda 223 059 oq bayroqdan iborat edi. Rassomning o‘zi mahalliy aholidan qurbonlar soni oshgani sayin yangi bayroqlarni o‘rnatishda yordam berishni iltimos qilgan. AQSh koronavirusdan vafot etganlar soni bo‘yicha dunyoda birinchi o‘rinda bormoqda.