Ryanair самолёти бомба ҳақидаги хабар туфайли шошилинч равишда Берлинга қўнди

Ryanair авиакомпаниясининг Дублиндан Краковга кетаётган самолёти шошилинч равишда Берлинга қўнди. Бу ҳақда Германия полициясига асосланиб, Deutsche Welle хабар берди.

Boeing 737 Германия пойтахтига 30 май куни Тошкент вақти билан соат 23:00 да қўнди. Аэропортда лайнерни ҳуқуқ-тартибот органлари ҳамда фавқулодда хизматлар ходимлари кутиб олди. Йўловчилар багажи аэродромга туширилди, итлар уни текшириб чиқди. Бортда 160 киши бўлгани айтилмоқда. АФП телеканали хабарига кўра, экипажнинг ўзи қўнишга рухсат сўраган.

Телеканалнинг маълум қилишича, қўниш учун парвоз чоғидаги фавқулодда вазият сабаб бўлган, шундан сўнг дарҳол унга Берлинга қўнишга рухсат берилган. Bild нашрининг ёзишича, бунга самолёт миналаштирилгани ҳақидаги хабар сабаб бўлган.

Бортда портловчи мослама борлиги тасдиқланмади. Йўловчилар бепул овқат билан таъминланди. Текширувлардан сўнг улар бошқа самолётга ўтириб, соат 5:00 атрофида Краковга жўнатилди.

Ryanair аниқлик киритишича, немис диспетчерлари экипажга таҳдид борлиги ҳақида хабар берган. «Ryanair’нинг ФР1901 рейси билан Дублиндан Краковга учган Ryanair экипажи кеча Германиянинг ҳаво ҳаракатини бошқариш томонидан бортдаги хавфсизликка таҳдид тўғрисида огоҳлантирилди. Капитан керакли процедураларни бажариб, энг яқин аэропортга, яъни Берлинга йўл олди», — деди авиакомпания. Самолётдаги йўловчилар манзилига, тахминан, саккиз соат кеч етиб борган.

Irish Examiner маълумотларига кўра, бу Ryanair самолётларининг сўнгги кунларда содир бўлаётган навбатдаги мажбурий қўнишидир. 29 май куни лайнернинг ҳожатхонасидан бортда портловчи мослама борлиги ҳақида ёзув топилгандан сўнг, Краковдан Дублинга учаётган самолёт Лондонга қўнган.

Самолётларнинг фавқулодда қўниши ҳақидаги хабарлар Ryanair авиакомпаниясининг парвози билан боғлиқ халқаро можаро фонида пайдо бўлмоқда. 23 май куни Беларусь ҳукумати Ryanair авиакомпаниясининг Афинадан Вильнюсга учаётган самолётини шошилинч равишда Минскка қўнишга мажбур қилганди. Самолёт йўловчилари орасида Nexta мухолифатчи Telegram канали собиқ бош муҳаррири Роман Протасевич бор эди, Беларусда унга қарши бир қатор жиноят ишлари қўзғатилган. Протасевич ва унинг севгилиси — Россия фуқароси Софя Сапега аэропортда қўлга олинган.

Беларусь расмийларининг маълум қилишича, Ryanair рейси бортида бомба борлиги ҳақида Минск аэропортига Фаластиннинг ҲАМАС ҳаракати номидан юборилган хабар келиб тушган. ҲАМАС ўзининг бу хабарга алоқаси йўқлигини айтди.

Ryanair самолётининг фавқулодда қўндирилишидан сўнг Европа мамлакатлари Беларусдан парвозларни қабул қилишни рад эта бошлади, Европа авиакомпаниялари эса Беларусь ҳаво ҳудудини кесиб ўтишдан бош тортмоқда.

Фуқаро авиацияси халқаро ташкилоти Ryanair самолётининг Минскка мажбурий қўниши юзасидан текширув ўтказишини маълум қилди. Ташкилотнинг  оралиқ ҳисоботи 25 июнда тақдим этилиши кутилмоқда.