Fransiya 7-iyun kuni AQShga ikkinchi Ozodlik haykalini yuboradi. Ushbu haykal Amerikada 10 yil davomida saqlanadi. Bu haqda Tengrinews xabar berdi.
Ma’lumotlarga ko‘ra, u asl Ozodlik haykalining kichik hajmdagi aynan nusxasi hisoblanib, XIX asr oxirida Gustav Eyfel tomonidan yaratilgan. Fransiyadan keltiriladigan Ozodlik haykali 2,83 metrni tashkil etadi. Shu vaqtgacha ushbu haykal Parij ko‘chalaridan birini bezab turgan.
Ma’lum qilinishicha, haykal Amerikaga 4-iyul kuni yetib keladi va Elis oroliga, Milliy migratsiya muzeyi hududiga o‘rnatiladi va 10 yil davomida o‘sha yerda turadi.
Nashrning yozishicha, Fransiya Ozodlik haykalini ikkinchi marta Atlantika okeanining narigi tomoniga yuboradi. Birinchi mashhur haykal Amerikaga 1886-yilda yuborilgan. Fransiyaning ushbu sovg‘asi AQSh Mustaqillik deklaratsiyasi qabul qilinganining 100 yilligi munosabati bilan taqdim etilgan. 135 yil o‘tgach, Fransiya AQSh bilan o‘zaro do‘stlik belgisi sifatida AQShga yana Ozodlik haykalini yuboradi.
Ma’lumot uchun, Angliyaning janubi-sharqidagi Vinchester universiteti hududida ham ekofaol Greta Tunbergning haykali o‘rnatildi. Haykalni o‘rnatish uchun ta’lim muassasasi 24 ming funt sterling (taxminan, 33 ming dollar) sarfladi.
Avvalroq Braziliyaning janubida joylashgan Enkantado shahrida Iso Masihning yangi haykali o‘rnatilishi haqida xabar berildi. U Rio-de-Janeyro shahridagi 38 metrlik mashhur Najotkor Masih haykalidan baland bo‘ladi.
Rossiyaning Sankt-Peterburg shahridagi Petrograd okrugidan o‘tuvchi Karpovka daryosi bo‘yida COVID-19 pandemiyasi davrida vafot etgan tibbiyot xodimlarining xotirasiga bag‘ishlangan yodgorlik ochildi. Ushbu haykalga “G‘amgin farishta” nomi berildi.
Izoh (0)