Ryanair самолёти билан боғлиқ воқеа туфайли Беларусга қарши санкциялар киритилганидан кейин Евроиттифоқ Россияга қарши ҳам санкция чораларини кўриб чиқиши керак. Бу ҳақда Европарламент раҳбари Давид Мария Сассоли айтиб ўтди, деб ёзади «РБК».
«Биз россиялик мансабдорларга қарши санкцияларни кучайтиришимиз керак, аммо шу билан бирга, аҳоли ва фуқаролик жамияти билан янада яқинроқ алоқа ўрнатиб, россиялик диссидентларни, ноҳукумат ташкилотларни ва мустақил ОАВларни қўллаб-қувватлашимиз керак», — деди У Функе медиагуруҳига берган интервьюсида.
Европарламент раҳбари, шунингдек, Евроиттифоқ ва Россия ўртасидаги муносабатлар айни пайтда «жуда кескин» эканини қайд этди.
Бундан ташқари, Сассоли Беларусда Nexta Telegram канали собиқ бош муҳаррири Роман Протасевичнинг қўлга олиниши юзасидан изоҳ берди ва уни озод этиш учун янада чоралар кўришга чақирди. Унинг фикрича, Протасевичнинг фотосурати Евроиттифоқнинг барча аэропортларига ва Европарламентга осиб қўйилиши керак».
Ҳозирда Сассоли, шунингдек, бошқа бир қатор европалик амалдорлар Россия санкцияларига учраган бўлиб, уларнинг Россия ҳудудига кириши тақиқланган. Москва Евроиттифоқнинг 2 ва 22 март кунлари олти нафар россияликка нисбатан чекловларига жавобан Евроиттифоқ вакиллари худди шундай чораларни қўллаган эди.
Европарламент апрелдаёқ Донбассдаги вазият кескинлашган ёки мухолифатчи Навальнийнинг соғлиғи ёмонлашган тақдирда Россияга нисбатан санкциявий босимни кучайтиришни таклиф қилган эди.
Аввалроқ эса Евроиттифоқ Россияга қарши туришда кучларни бирлаштириш таклифини Вашингтонга йўналтирган эди. У Евроиттифоқ-АҚШ саммити қўшма баёноти лойиҳасига киритилган бўлиб, саммит 15 июнда Брюсселда бўлиб ўтади, эртаси куни эса Женевада олий даражадаги Америка-Россия учрашуви бўлиб ўтиши керак.
Изоҳ (0)