Ўзбекистондаги 40 фоиз кўприк ва йўл ўтказгичлар яроқсиз, қониқарсиз ва таъмирталаб ҳолатга келиб қолган – Сенат

Ўзбекистонда мавжуд кўприкларнинг деярли ярми яроқсиз ҳолатда. Бу ҳақда Олий Мажлис Сенатининг ялпи мажлисида маълум қилинди.

Қайд этилишича, республика автомобиль йўлларида ўтказилган хатлов натижаларига кўра, бугунги кунда 15 мингга яқин кўприк мавжуд бўлиб, шундан 40 фоиз кўприк ва йўл ўтказгичларнинг эксплуатацион ҳолати яроқсиз, қониқарсиз ва таъмирталаб ҳолатга келиб қолган.

Бундан ташқари, автомобиль йўлларида жойлашган ва эгаси аниқланмаган кўприкларни сақловчиларга топшириш ишлари амалга оширилиши ўрганилганида 3477 дона кўприк ўз эгаларига берилмагани аниқланди.

«Ўз ҳолига ташлаб қўйилган ва яроқсиз ҳолга келган кўприклар эса фуқароларнинг хавфсиз ҳаракатланишига салбий таъсир кўрсатмоқда, уларнинг ҳақли эътирозларига сабаб бўлмоқда», – дейилади Сенат ахборотида.

Бундан аввал Тошкентда учта йўл ўтказгич ва олти полосали йўлни қуриш 49 млн долларга қадар қимматлашгани, Андижондаги «Алвасти кўприк» ўрнида янги кўприк фойдаланишга топширилгани ҳамда Сурхондарёда интернетда яроқсизлиги билан «машҳурликка» эришган ва 16,1 млрд сўмга тушган кўприк фойдаланишга топширилгани ҳақида хабар берилганди.