Andijonda 9 yoshli qizni o‘ldirganlikda ayblanib, viloyat sudi tomonidan oqlangan ayol ishi yuzasidan prokuratura Oliy sudga protest kiritdi

Andijon viloyatining Asaka tumanida 2020-yilning iyunida 9 yoshli qizaloq tanasining turli joylariga pichoq tiqib o‘ldirib ketilgani, qotillikda gumonlanib 23 yoshli qo‘shni ayol qo‘lga olingani haqida xabar berilgan edi. Andijon viloyat sudi jinoyat ishlari bo‘yicha sudlov hay’atining 2021-yil 5-maydagi hukmi bilan sudlanuvchi aybsiz deb topildi va oqlangandi. Ushbu ish yuzasidan viloyat prokuraturasi Oliy sudga protest kiritdi, deya xabar bermoqda Bosh prokuratura.

Ma’lum qilinishicha, 2020-yil 21-iyun kuni Asaka tumanida 9 yoshli qizning murdasi o‘z uyida qotillik alomatlari bilan topilgan.

Mazkur holat yuzasidan jinoyat ishi qo‘zg‘atilib, tergov harakatlari Bosh prokuraturaning O‘ta og‘ir jinoyatlarni tergov qilish boshqarmasi tomonidan olib borilgan.

To‘plangan dalillarga asosan dastlabki tergovda fuqaro A.X. 2020-yil 21-iyun kuni qo‘shnisi D.A. istiqomat qiladigan uyga o‘g‘rilik maqsadida kirgani va u yerdan pul olganiga guvoh bo‘lgan yosh bola Q.I.ning tanasiga bir necha marotaba pichoq bilan jarohat yetkazib, uni qasddan o‘ldirgani aniqlangan.

Shuningdek, A.X. o‘g‘irlik hamda firibgarlik jinoyatlarini ham sodir etganligi o‘z isbotini topgan.

Ayblanuvchining aybi uning ko‘rsatuvi bo‘yicha olingan ashyoviy dalil (pichoq), pichoq dastasi ichidan olingan namuna marhuma qizga tegishli ekanligi tasdiqlangan ekspertiza xulosasi, guvohlarning ko‘rsatuvlari, xususan, to‘rt nafar guvoh A.X. marhuma qizning xonadonidan yugurib chiqqanini ko‘rishgani va boshqa dalillar bilan to‘liq isbotlangan.

Bundan tashqari, A.X. o‘z aybiga iqrorligini ham bayon qilgan. Jumladan, qo‘shnisining uyiga o‘g‘irlik maqsadida kirgani va shu qo‘shnining yosh qizi (marhuma) uni ko‘rib qolganidan qo‘rqib, uni pichoq bilan o‘ldirganligini tan olgan.

A.X.ning iqrorlik ko‘rsatuvlari real voqelikka asoslangani va ixtiyoriy ravishda berilgani sud-psixologiya ekspertizasi xulosasi bilan tasdiqlangan.

Ommaviy axborot vositalari va ijtimoiy tarmoqlardagi chiqishlarda go‘yoki “asos” qilib ko‘rsatilayotgan “marhuma qizning zo‘rlangani” ham sud-komissiyaviy ekspertizada o‘z isbotini topmagan.

Avvalroq ish dastlab 2020-yil 21-iyun kuni mazkur jinoyat ishi ayblov xulosasi bilan mazmunan ko‘rish uchun Andijon viloyat sudiga yuborilgan.

Biroq tergov davomida aniqlangan va isbotlangan dalil hamda vajlar sud tomonidan inobatga olinmagan, o‘ta og‘ir jinoyat harakatlariga yetarli baho berilmagan.

Shu tariqa Andijon viloyat sudi jinoyat ishlari bo‘yicha sudlov hay’atining 2021-yil 5-maydagi hukmi bilan A.X. faqatgina firibgarlikda, ya’ni marhuma qizning onasiga tegishli bo‘lgan tilla zanjirni aldov yo‘li bilan qo‘lga kiritishda aybdor deb topilib, unga nisbatan 2 yil muddatga ozodlikdan cheklash jazosi tayinlangan. O‘g‘irlik, bosqinchilik va mudhish jinoyat – qotillik yuzasidan esa, u oqlangan.

Shu bois 2021-yil 12-may kuni Andijon viloyat prokuraturasi tomonidan Andijon viloyat sudi jinoyat ishlari bo‘yicha sudlov hay’atining 2021-yil 5-maydagi hukmiga nisbatan Oliy sudning jinoyat ishlari bo‘yicha apellyatsiya instansiyasiga apellyatsiya tartibida protest keltirilgan.

“Binobarin, Bosh prokuratura ish bo‘yicha manfaatdor taraflar va keng jamoatchilik, xususan, ommaviy axborot vositalaridan quyidagi jihatlarga e’tibor qaratishni so‘raydi:

• birinchidan, viloyat sudi tomonidan oqlangan sudlanuvchining “aybsiz” ekanligi haqida sudning yakuniy hukmi qonuniy kuchga kirmasdan turib, xulosa qilishga hali erta.

Zotan, ish bo‘yicha sudlov jarayonlari mavjud hujjatlar, dalillar, guvohlarning ko‘rsatuvlari, ayblov xulosasiga asos qilib keltirilgan boshqa jihatlarga viloyat sudi tomonidan har tomonlama munosib baho berilmaganini ko‘rsatib turibdi;

• ikkinchidan, asosan, himoya tarafi va sudlanuvchi keng jamoatchilikka taqdim etayotgan “tafsilotlar” asosida ehtirosli xulosalarga kelish noo‘rindir.

Zero, gap 9 yoshida vahshiylarcha qotillikning qurboni bo‘lgan qizaloqning ayanchli taqdiri uchun aybdorni so‘zsiz javobgarlikka tortish, bir norasida farzandi o‘ldirilgan oilaning iztiroblari, jazoning muqarrarligi va adolat tantanasiga bo‘lgan umidi hamda ishonchi haqida bormoqda.

• uchinchidan, aynan sudning, aniqrog‘i, Oliy sudning yakuniy to‘xtamidan keyingina jinoyat ishi bo‘yicha qo‘shimcha ravishda tegishli munosabat bildiriladi,

– deyiladi Bosh prokuratura bayonotida.

Bundan avval Toshkentda 5 yoshli o‘g‘lini urib o‘ldirgan sport murabbiyiga sud hukmi o‘qilgani, Andijonlik ayol eri bilan janjallashib qolib, uni pichoqlab o‘ldirgani hamda Dehqonobodda o‘qituvchini pichoqlab o‘ldirgan qotillardan biri 17 yilga, yana biri 16 yil muddatga qamalgani haqida xabar berilgandi.