21-iyun kuni Asakada 9 yoshli qizaloq o‘z uyida o‘ldirib ketilgani to‘g‘risida xabar berilgandi. “Xabar.uz”ning Bosh prokuraturaga asoslanib ma’lum qilishicha, ko‘krak-qorin sohasida kesuvchi-sanchuvchi jismlar orqali yetkazilgan 18 ta tan jarohati oqibatida vafot etgan qizaloqning o‘limida gumon qilinib, 23 yashar qo‘shni ayol hibsga olingan.
Ma’lumotlarga ko‘ra, A.X. (gumondor tariqasida qo‘lga olingan ayol, 1997-yilda tug‘ilgan, bir nafar farzandi bor) marhuma voyaga yetayotgan xonadonga qo‘shni bo‘lib, fojia sodir bo‘lgan kuni uning (marhumaning) onasini “bolasiga qarab turish” iltimosi uyiga taklif qilgan.
Ayol qo‘shnining uyi qarovsiz qolganidan foylanib, o‘g‘rilik maqsadida u yerga kirgan va tortmadan 500 ming so‘m pul olayotgan vaqtida uni 9 yoshli Q.I. ko‘rib qolgan. Ayol jinoyatini yashirish maqsadida o‘zi bilan olib chiqqan (xonadondagi shkaflarning qulfini ochish uchun) pichoqni qizaloq tanasining turli joylariga qasddan sanchib, hodisa joyidan yashiringan.
A.X.ning ko‘rsatmalari hodisa joyiga chiqib tekshirilganda jinoyat quroli sifatida foydalangan pichoq topilib, tegishli tartibda rasmiylashtirilgan holda jinoyat ishiga qo‘shilgan.
Jinoyat ishi yuzasidan guvoh tariqasida so‘roq qilingan bir necha nafar qo‘shni fojia sodir bo‘lgan vaqtda A.X. qizaloq yashaydigan uyga uch marotaba kirib-chiqqanligini ko‘rishganini aytgan.
Ta’kidlanishicha, mazkur jinoyat ishi Bosh prokuror tashabbusi bilan markaziy mahkama ish yurituviga olinib, uning shaxsiy nazorati ostida O‘ta og‘ir jinoyatlarni tergov qilish boshqarmasi tomonidan tergov harakatlari olib borilmoqda.
Avvalroq Asaka tumanida 25 yoshli yigit bir qiz tufayli tengdoshini pichoqlab qo‘ygani to‘g‘risida xabar berilgandi.
