26 май куни ижтимоий тармоқларда Андижон шаҳри кўчаларида кучли шамол ва чанг бўронлари кузатилгани тасвирланган видеолар тарқалганди. «Ўзгидромет» мазкур кучли чанг бўронининг асосий сабабларини маълум қилди.
Андижон метеостанцияси маълумотларига кўра, 26 май куни соат 18:00 дан 19:00 гача шаҳарда шиддатли кучли шамол кузатилган. Бунда шамол тезлиги сониясига 16 метрга етган. Кучли шамол ҳаво массаси жуда беқарор бўлганда юзага келадиган конвектив жараёнлар натижасида пайдо бўлади.
«Бизнинг ҳудудимизда бундай жараёнлар атмосферанинг сиртки қатламида ҳаво етарлича исиганда, ҳарорат кўтарилганда эса тезда пасайишида кўпинча баҳорда ва ёзнинг бошларида ривожланади. Ҳаво массасининг термал беқарорлигидан келиб чиқадиган фаол вертикал ҳаракатлар одатда куннинг иккинчи ярмида, кечга яқин содир бўлади ва ёмғирли тўп-тўп булутлар шаклланишига ва шиддатли шамол пайдо бўлишига олиб келади», — дейилади хабарда.
Таъкидланишича, бундай вазиятларда ҳаво намлиги етарлича бўлса, момақалдироқ кузатилади ва жала ёмғирлар ёғади. Аммо ҳаво намлик билан етарли даражада тўйинмаган ва ушбу ҳолатда фақат кучли шамол юзага келган, шу сабабли у ер юзасидан қум ва чанг заррачаларини кўтарган.
Мавзуга доир: Тошкент марказида кучли шамол оқибатида Malibu устига дарахт қулади. Ҳайдовчи қиз жароҳат олгани айтилмоқда
Изоҳ (0)