2021 йил охирига қадар Ўзбекистон Президенти Шавкат Мирзиёевнинг Брюсселга ташрифи кутилмоқда. Ташриф доирасида ҳар томонлама шериклик ва ҳамкорлик бўйича янги шартномаларни имзолаш режалаштирилган. Бу ҳақда Европа Иттифоқининг Марказий Осиё бўйича махсус вакили Питер Бурианга таяниб, «Gazeta.uz» хабар берди.
Кенгайтирилган шериклик ва ҳамкорлик борасидаги битим 1999 йилдан буён амалда бўлган шериклик ва ҳамкорлик битимнинг ўринини эгаллайди. Аввалроқ Ташқи ишлар вазирлиги Европа Иттифоқи ва Ўзбекистон кенгайтирилган шериклик ва ҳамкорлик тўғрисида битимни 2020 йилда имзолаш ниятида бўлганини, бироқ коронавирус пандемияси сабаб вазият бироз ўзгарганини маълум қилганди.
«Ушбу битимнинг деярли асосий йўналишлари бўйича ишлар якунланиб қолган. Биз мазкур жараённи йил охирига қадар якунлашга тайёрмиз. Бу Президент Мирзиёевнинг Брюсселга ташрифи учун яхши сабаб бўлади дея ҳисоблаймиз», — дейди Питер Буриан.
Махсус вакилнинг таъкидлашича, Ўзбекистон Президентининг ташрифи «катта интиқлик билан» кутилмоқда. «Чунки бу иккала томон ҳам ҳамкорликни ривожлантириш масалаларига жуда жиддий ёндашаётгани борасида муҳим сигналдир», — дейди элчи.
Дипломатнинг қўшимча қилишича, Ўзбекистондаги ислоҳотлар жараёни ЙИ ва Тошкент ўртасидаги ҳамкорликни сезиларли даражада оширишга хизмат қилади. «Биз ушбу битимда барча энг илғор тажриба ва соҳаларни ифода этишга уриняпмиз», — дейди Питер Буриан.
Изоҳ (0)