28—29 май кунлари Олий Мажлис Сенатининг ўн бешинчи ялпи мажлиси бўлиб ўтади. Бу ҳақда Сенат Кенгаши томонидан 25 май куни бўлиб ўтган йиғилишда маълум қилинган, деб хабар беради парламент юқори палатаси матбуот хизмати.
Бўлиб ўтадиган ялпи мажлисда «Транспорт тўғрисида»ги, «Қимматбаҳо металлар ва қимматбаҳо тошлар тўғрисида»ги, «Ўзбекистон Республикаси маданият ва санъат ходимлари кунини белгилаш тўғрисида»ги, «Ўзбекистон Республикасининг Сайлов кодексига ўзгартиш ва қўшимчалар киритиш тўғрисида»ги ва бошқа қатор қонунлар муҳокама қилиниши режалаштирилган.
Бундан ташқари, Ўзбекистонда 2030 йилга қадар гендер тенгликка эришиш стратегияси тўғрисидаги масала кўрилади ҳамда Вазирлар Маҳкамасининг Давлат бюджети 2020 йил ва 2021 йил биринчи чораги якуни бўйича ижроси тўғрисидаги ҳисоботларни эшитилади.
Ялпи мажлисда таълим муассасалари битирувчилари бандлигини таъминлаш билан боғлиқ муаммолар ҳамда коронавирус пандемиясидан кейин туризмни тиклаш ва ривожлантиришга қаратилган чора-тадбирларнинг амалга оширилиши ҳолати юзасидан Вазирлар Маҳкамасига парламент сўровлари юбориш, шунингдек, бошқа масалалар кўриб чиқилиши ҳам кўзда тутилган.
Эслатиб ўтамиз, бундан олдинги Сенат ялпи мажлиси 23 апрель куни бўлиб ўтган. Унда «Ўзбекистонда чет эл фуқароларининг ва фуқаролиги бўлмаган шахсларнинг ҳуқуқий ҳолати тўғрисида», «Лицензиялаш, рухсат бериш ва хабардор қилиш тартиб-таомиллари тўғрисида», «Фазовий маълумотлар тўғрисида» ва бошқа қатор қонунлар кўриб чиқилган эди.
Изоҳ (0)