Самарқанд вилоятининг Самарқанд туманида ўзлари ижара асосида фойдаланиб келаётган ерни ноқонуний сотмоқчи бўлган икки киши ушланди. Бу ҳақда «Дарё»га ДХХ матбуот хизмати хабар берди.
Маълум қилинишича, ушбу фуқаролар ҳокимият балансида бўлган тоғли ҳудуддаги 3 гектар яйлов ер майдонини маҳаллий фуқарога 30 минг долларга сотишни режалаштириб, туман ҳокимлигидаги танишлари орқали харидор номига расмийлаштириб беришни ваъда қилган.
ДХХ Самарқанд вилояти бошқармаси ҳамда вилоят ички ишлар бошқармаси ходимлари томонидан ўтказилган тезкор тадбирда ушбу шахслар сўралган пулдан 12,5 минг долларини олган вақтида ашёвий далиллар билан ушланган.
Қайд этилишича, ҳозирда ушбу шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Аввалроқ Самарқанднинг Оқдарё туманида 50 минг доллар ва Nexia-3 эвазига 1 гектар ер олиб бермоқчи бўлган фермер хўжалиги раҳбари ушлангани, вилоятнинг Ургут ва Булунғур туманида ер сотиш билан боғлиқ фирибгарлик ҳолатлари аниқлангани ҳақида хабар берилган эди.
Изоҳ (0)