2021 йилнинг шу кунига қадар Ўзбекистондаги саноат корхона ва ташкилотларида жами 15 та бахтсиз ҳодиса рўй берган. Унинг 5 тасида ўлим ҳолати қайд этилган. Бу ҳақда АОКАда Кўмир, кон-руда ва норуда соҳаларида саноат хавфсизлиги инспекцияси мутасаддилари иштирокида ўтказилган матбуот анжуманида маълум қилинди.
2021 йил бошидан Саноат хавфсизлиги давлат қўмитаси Кўмир, кон-руда ва норуда соҳаларида саноат хавфсизлиги инспекцияси ходимлари томонидан назорат остидаги корхона ва ташкилотларда жами 444 та давлат назорати ва 1150 та назорат-профилактика ишлари ўтказилиб, 5931 та саноат хавфсизлиги ҳамда кончилик ишларини ва ерости бойликларидан бехатар фойдаланиш талаблари ва қоида бузилишлари аниқланган.
Хавфли ишлаб чиқариш объектларида авариялар ва бахтсиз ҳодисаларнинг олдини олиш мақсадида 12 ҳолатда хавфли ишлаб чиқариш объектларида ишлар вақтинча тўхтатиб қўйилган ва ишчилар бехатар жойга олиб чиқилган.
Шунга қарамасдан, Кўмир, кон-руда ва норуда соҳаларида саноат хавфсизлиги инспекцияси назорат остидаги корхона ва ташкилотларда жами 15 та бахтсиз ҳодиса рўй берган. Улардан 1 таси гуруҳий, 2 таси енгил, 7 таси оғир ва 5 таси оқибати ўлим билан тугаган бахтсиз ҳодисалардир.
Содир бўлган бахтсиз ҳодисалар текшириш якунлари бўйича 9 та ҳужжат ҳуқуқни муҳофаза қилиш органларига қонунчиликда белгиланган тартибда чоралар кўриш учун тақдим этилган.
Эслатиб ўтамиз, 20 январь куни «Янги Ангрен» иссиқлик электр станциясининг профилактика чораларини кўриш учун тўхтатилган 5-энергия блокида чанг-кўмирли ҳаво аралашмасининг портлаши содир бўлган, портлаш оқибатида уч киши ҳалок бўлган ва яна уч киши жароҳат олганди. Кейинроқ портлаган цехнинг раҳбари ўзини осиб қўйгани маълум бўлган.
Изоҳ (0)