Андижонлик фуқаро «Андижон музқаймоқлари» савдо белгиси сифатида рўйхатдан ўтказмоқда, деб хабар берди Spot Саноат мулки муҳофазаси порталидаги маълумотларга таяниб. Талабнома жисмоний шахс томонидан 24 май куни берилган бўлиб, айни пайтда расмий экспертизада.
Ушбу музқаймоқ март ойидан буён Тошкент ва бошқа шаҳарларда кенг тарқалган эди. У кўчаларда, одатда кўчма музлаткичларда сотилади.
Spot суҳбатлашган бир неча андижонликлар бу каби қутиларни 90 йиллардан буён кўришганини, аммо бу мустақил бренд бўлиши мумкинлигини хаёлларига келтирмаганларини айтган.
Тошкентда «Андижон музқаймоқлари» билан савдо қилувчи бир неча сотувчилар ёлланган ходимлар эканликларини таъкидлаб, музқаймоқнинг таркиби ва унинг ишлаб чиқарувчисини айта олмаган.
OLX’да ҳақиқатан ҳам «Андижон музқаймоқлари»ни сотиш учун кунига 30 минг сўмдан 100 минг сўмгача ҳақ тўланиши айтилган эълонларни кўриш мумкин. Шунингдек, сайтда ушбу музқаймоқни кейинчалик чакана савдога чиқариш учун 1 килограмм учун 20 минг сўмдан улгуржи нархда сотиб олиш таклифлари жойлаштирилган.
Изоҳ (0)