«ИИО ходимлари айбланувчиларнинг пул ва моддий бойликларини олиб қўйгани ҳақидаги хабарлар асоссиз». «Муродбой иши» бўйича қўшимча маълумот берилди

Суд залидаги бир нечта фуқаро қўлларини кесиб, ИИБ ходимлари билан тортишгани акс этган видео ижтимоий тармоқларда тарқалди. Видеонинг изоҳида айтилишича, ҳуқуқни муҳофаза қилиш идоралари «Муродбой иши» доирасида айбланувчиларга тегишли 3 килограмм олтин, 6 миллиард сўм ва қимматбаҳо машиналарни ўзлаштирган. Ҳодиса ҳақида Тошкент вилояти ички ишлар бошқармаси изоҳ берди.

Бошқарма маълумотларига кўра, видео 25 май куни Жиноят ишлари бўйича Янгийўл шаҳар судида ўтказилган беш фуқаро устидан олиб борилган суд жараёнида олинган. Айбланувчилардан уч нафари Жиноят кодексининг 168-моддаси 3-қисмининг «в» банди (ўта катта миқдордаги фирибгарлик) ва бошқа моддалари билан турли муддатларга ҳукм қилинган.

Айбланувчи Мирзамурод Юнусалиев (9 йил 2 ойга ҳукм қилинган), Ғофуржон Муроджонов (7 йил) ва Амиран Қудратов (8 йил) суд жараёнида лезвия билан чап билакларини кесиб ташлаган, дейилади ИИБ баёнотида.

Бошқарманинг таъкидлашича, «айбланувчиларнинг пул ва моддий бойликлари ИИО ходимлари томонидан олиб қўйилган деган хабарлар мутлақо асоссиз».

Ҳозирда вазият назорат остида, ҳодиса сабаблари ўрганилмоқда.

Маълумотларга кўра, улар 2015 йилга қадар чинозлик Аҳмадбойнинг ёрдамчиларидан бўлган ва халқ орасида Муродбой номи билан танилган Мирзамурод Юнусалиев ишига алоқадорлиги юзасидан судга чақирилган. Маҳбуслар соат 20:00 ларда 1-сон тергов ҳибсхонасига олиб бориб топширилган.

Тергов ҳаракатлари давомида М.Юнусалиев 2016 йил январь ойида «Эркин авто диллер» номли МЧЖ замирида молиявий пирамида ташкил этиб, бу ишга ўзининг ўнга яқин жиноий шерикларини жалб қилгани, улар ёрдамида 6636 та ҳолатда 4000 нафарга яқин фуқаронинг 26 миллион 870 минг 51 АҚШ доллари ва 18 миллиард сўм миқдордаги пул ва бошқа мол-мулкларини фирибгарлик йўли билан қўлга киритгани аниқланган.

Жиноят иши бўйича қарийб 8 миллиард сўмлик 18 та кўчмас мулк объектлари (уй, чойхона, дўкон биноси, нотурар бино ва иншоотлар) хатланган. Фуқароларга тегишли 85 та енгил автомашина ашёвий далил тариқасида олинган. Ушбу машиналарнинг барчаси белгиланган тартибда баҳоланиб, ўз эгаларига қайтарилган.